無綫熱播劇《香港探秘地圖》進入結局周，視帝黎耀祥、視后龔嘉欣、丁子朗（丁丁）、孔德賢、袁文傑、袁潔儀和楊玉梅等，今日（6日）現身將軍澳出席「探秘尋蹤揭破迷局」宣傳。現場播出多條劇集預告片，片中倪嘉雯突然「上身」追打黎耀祥，拳打龔嘉欣小腹，對黎耀祥叉頸，十分兇狠；另一條片是倪嘉雯跳「Bob頭舞」，不過倪嘉雯今晚要準備《魔音女團》出道綵排，所以未能出席宣傳，改由丁子朗和孔德贀反串女裝，帶領曾文心、張詩欣、蔡菀庭和梁珈詠現場跳舞，丁子朗和孔德贀穿短裙露出飛毛腿，非常搞笑，丁子朗內裏的打底褲過長，惹來黎耀祥好奇抽起丁丁裙底看，袁文傑都忍不住摸丁丁毛腿，袁潔儀劇中演丁丁媽咪，表示要打丁丁屁股。黎耀祥睇得好開心，大讚他們有前有後及腳毛：「同劇主題一樣，撞鬼！可以出道，出彌敦道，應該返唔到嚟。」龔嘉欣就取笑孔德賢：「我多咗個妹。」
黎耀祥被倪嘉雯追打戲當日在九龍城後巷拍了一日，拍攝時頗辛苦，下着毛毛雨大家都濕身，笑指被倪嘉雯真打：「佢一啲內疚都冇，照打，因為佢未拍過打戲，之後可以做打女。」嘉欣表示好彩有腹肌頂住不怕打。
黎耀祥提到劇情將會峰迴路轉，人物關係千絲萬縷，龔嘉欣之前處處針對他打假，透露之後會改變態度變得溫柔，至於嘉欣與丁丁的姊弟戀能否開花結果，她笑言己忘記，黎耀祥表示可能留待拍續集。
嘉欣表示好想跟黎耀再合作，因為每次都有不一樣火花，上次合作《殺手》今次《香港探秘地圖》，希望下次不用等太耐。黎耀祥直言希望拍續集，網民反應幾好，覺得這類主題全面，既是開心喜劇、又有感情、靈異神秘，覺得可以拍下去，笑言可拍澳門探秘、大灣區探秘、馬拉探秘，美加澳紐探秘亦得，做埋美食節目又得，嘉欣大讚黎耀祥有諗頭，黎耀祥講笑：「有你喺身邊乜都拍得，你拍節目又唔請我做嘉賓，搵大廚煮嘢食唔叫我，我最鍾意食嘢，下次預我拍香港美食地圖。」
龔嘉欣近日捲入雙面人風波，日前藝人梁嘉琪在訪問中大爆當年在橫店拍攝《金枝慾孽貳》有女星在片場愛擺款對人「指指點點」，矛頭直指嘉欣，嘉欣表示近日忙於拍劇，沒有留意此事，表示心情沒受影響，覺得不需要平反，只表示：「我冇經歷過這件事，唔清楚佢哋講邊個，但唔會八卦，同埋幫第二個台宣傳節目也不太好，今日講完不再講太多。（冇經歷指指點點？）冇呀！自己當時都係新人，拍劇都大壓力，只係集中做嘢。」她表示沒有為此事不開心，當時較少接觸梁嘉琪，跟同劇演員關係好齊心合力，直言一套戲不是一個人，是全部人都做好才好睇。透露近日為新劇開工日日通宵但好開心，自言一路以來都認真工作。
另外提到鍾景輝（King Sir）離世，黎耀祥曾與King Sir合作《愛．回家之八時入席》和《大太監》，黎耀祥表示King Sir是很好前輩，從冇在片場發脾氣，或與導演拗撬，所有事做好準備，是演員的示範，是大家的榜樣：「佢係香港演藝史的開始，工作態度對大家影響好大，是好老師，所以好可惜，慶幸屋企舒服地走，因為知道老人家身體不適幾年，希望他一路好走。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
