藝人莊子璇與倪樂琳同樣是選港姐入行，但由普通人變成公眾人物卻承受巨大壓力，尤其是面對Hater不斷攻擊的莊子璇，直言就算擁有強大心臟，也被轟得心碎，情緒大受困擾。面對毒辣評價，倪樂琳則互相勉勵，認為要好似「小強」一樣，擁有打不死的精神。
前港姐冠軍莊子璇（Hilary）與倪樂琳（Ellyn）的演藝路十分相似，同樣是透過選港姐，戴着后冠光環入行，最近更齊齊在真人騷《魔音女團》中跑出變身女團。二人原來早在選美時已經有淵源，加上共同面對女團的地獄式訓練，感情有增無減。倪樂琳說：「選美嗰陣Hilary好好，同我哋逐個女仔傾，教我哋點樣面對壓力、點樣表現得好啲，好照顧我哋。」莊子璇則對當時的倪樂琳印象相當深刻，覺得她很獨立、有諗法，思想比她更豁達，故也不用輔導太多。
莊子璇與倪樂琳雖然有冠軍光環加持，入行看似是萬千寵愛，但現實中卻要面對現時藝人最大的「敵人」——網上Hater的狙擊，尤其是莊子璇，由選美是非到近年不斷被指樣貌進化，在飽受惡評煎熬下，情緒受影響，只能夠採取「避之則吉」的方法應對，她說：「入行之後，愈多人認識，亦愈多唔好嘅評論、攻擊，依家會採取一個方法，由上年開始已經唔睇Comment，自己冇Ellyn咁豁達，睇到會好在意，唔睇就係最好。最初仲會特登Search，逐個Post去睇，甚至會睇吓佢係咩人，好似走火入魔咁，開始覺得心理唔係好健康，所以就停咗唔睇，仲Del咗帳號，依家好啲先有番。」又指正努力學習怎樣面對不好的評論，認為無法改變別人，只能改變自己。
曾後悔入行
倪樂琳為面對惡評的莊子璇抱不平，她說：「入行面對咁多唔好嘅評價，要好多勇氣，唔好話Hilary，睇到網民評價自己都幾唔開心，有啲網民講嘢都幾毒辣，希望手下留情，其實我哋都係好善良嘅細路女。」她指雖然會用社交網，但現在也不會刻意去看評價，免得自己不開心，惟有用時間、努力去證明自己。莊子璇則以「逃避雖可恥但有用」的方法應對，認為不看網民評價是沒有辦法中的辦法，亦有尋求過心理醫生幫助，現在比起最壞的時期已經好轉，她說：「嗰陣由普通人變成公眾人物，可能有成千上萬嘅人攻擊你，覺得自己算係強心臟，但個心都碎晒。」
二人不約而同指曾對入行感到有點後悔，莊子璇說：「有幻想做緊營養師會係點，上年屋企人身體有問題退咗休，都要養家，壓力就大啲，盡量唔畀佢哋知，希望佢哋睇到嘅都係好嘢。」倪樂琳說：「最難捱係頭兩年，乜都係未知數，工作唔穩定，做呢行會唔會好多年都冇盼頭，見身邊朋友按部就班搵份工，已經可以畀家用、請屋企人旅行，點解我做唔到？雖然屋企唔等住我養，但作為一個女，都想畀父母更上一層樓嘅生活。」
團員零是非
不過在未知的將來中，二人卻迎來事業發展上的曙光，成功在《魔音女團》跑出，由港姐變身女團，她們皆覺得是難得的機會，會努力把握。莊子璇期待推出團歌外，亦期待各自有個人作品。倪樂琳則認為女團最重要是團魂：「啲人成日講，女團唔驚冇人識、唔驚紅唔到，最驚係解散。6個人一齊腳踏實地去行，話唔定可以走出嚟，我哋好團結，有《魔音》基石。朋友成日問我有咩八卦、勾心鬥角？但真係冇，16個女仔嚟真係為咗追夢、攞機會，等觀眾認識。」莊子璇笑指節目組也很想她們有是非，以製造節目效果，但大家卻是不爭不搶的人。倪樂琳覺得外間會認為她們是競爭對手，但實情卻是互相的心靈支柱：「好多時大家脆弱嘅時候，都係靠互相開解、攬下、講下笑，令大家狀態好啲。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
