男團MIRROR人氣王姜濤日前於澳門騷上挑戰「歌神」張學友經典歌曲《李香蘭》，神情緊張嘅姜濤開口唱第一句時「惱…春風」就「撻Q」大叫「停」，笑到踎低咁表示「入錯Key」要重唱，同時要求全場粉絲不可上載佢嘅「炒車」片，並限在10秒內delete，場面搞笑。當然Fans梗係唔會放過展示偶像才華嘅機會照upload，咁啱就引得無綫劇集《愛．回家之開心速遞》「龔燁」張景淳留言讚好。
張景淳僅於該演唱片段下留言「幾好聽」，怎料竟鬥網民惡意留言，以《愛．回家》即將停播去寸佢：「因為冇得做《愛．回家》，先去黐埋人哋嗰邊？」張景淳即霸氣又沉穩留言回應：「呢個留言係無乜腦的。不過你牽扯到《愛．回家》心眼咁壞，覆你。我係TVB藝人，黐乜？會得到乜實際利益你話番我知？threads自動畀我睇，聽到第一句，最後無飛片聽晒，呢首歌唔係容易唱得好或有感覺。而surprise我係姜濤平時唱歌並無呢種感覺，呢次有而且今時今日令一個唔係fans嘅人睇晒幾分鐘片係一定有啲嘢值得。我純粹簡單三個字表達，你哋都要陰謀論咁多？心眼何壞。」
而張景淳本為歌手出身，2003年與莊嘉敏（Selina）和陳逸樵（Wattie）以組合Cheers出道，曾推出過《十年約會》、《想著你睡不著》等歌曲，點講都係樂壇前輩，對歌藝有一定話語權。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
