HOY首個大型選秀節目《我要做主播》今明兩天進行海選，吸引逾百人參加，將選出30強進入第二輪，節目由陳啟泰及方健儀擔任主持，他們並負責面試參賽者今日海選中不乏熟口熟面臉孔，包括離巢TVB的兒童節目主持馬俊傑及「十億千金」黃文意。
陳啟泰對參賽要求字正腔圓、冇懶音和必須淡定，方健儀要求字正腔圓、自信外，亦要有新聞觸覺，她認為有報新聞腔會加分，令人精神為之一振，陳啟泰也欣賞說話響亮的人，會引起他注意。他說其中一位最年長參加者69歲，擁博士學歷，大讚對方勇氣可嘉，值得佩服，方健儀開心節目帶出不受年齡限制，想做就去做的訊息。陳啟泰主持的《百萬富翁》節目深入民心，他說：「我問參賽者想㨂做娛樂、新聞、財經定體育主播，佢好驚，問我有冇錦囊，哈哈！（有冇嚇親人？）有個小妹妹話爸爸唔睇電視只看《百萬富翁》節目。」方健儀表示有參賽者自稱是她粉絲，喚醒自己的社會責任，要做好榜樣，但評分睇表現，不會特別手鬆，但覺得該參賽者表現好好。問樣靚會加分？方健儀笑言：「我都做到，大家都可以放心我嘅門檻都低，但要注重整齊乾淨。」今次是兩人第三度合作，現場互笠高帽一番。
陳啟泰日前被網民捕獲轉行做地鐵職員，他表示是為地鐵主持遊戲節目及拍宣傳片，當日做地鐵月台助理個多小時，笑言好多人向他問路，部分認得他的途人給予正面鼓勵，很開心，不怕被人覺得他無嘢做轉行，因為當天真的在港鐵打工。他日前自爆受重度抑鬱症困擾，他表示永遠回答好了6成，因為總覺得愈來愈好，現時沒有食藥，全靠做運動、排毒和食保健品，有宗教和太太支持才好番。
黃文意和馬俊傑24年先後離巢無綫，在電視台時兩人互不相識，離開公司後經友人介紹下認識，大方承認是情侶關係，黃文意現時是斜槓族，做KOL和主持，今次因為男友提議一起參加：「不過工作私事分開，難得有個節目可以一齊嘗試，當玩吓！」對於面試表現，她覺得工作性質同以前大不同，主播專業很多，所以抱住挑戰自己心態來體會。問可以組CP參賽，她表示冇想過，要尊重節目組，參加是想爭取上鏡機會，在無綫冇工作機會？她說：「同無綫嘅長合約完咗，覺得娛樂圈生態改變，好多人在不同平台發展，唔使畀一份合約綁死，可能好處更大。」她說父親從事生態能量，工作並不太適合她，所以未有參與屋企生意，希望繼續追演藝夢，多方面嘗試，但自言並不進取，抱平常心，邊度有機會就去邊度。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
