美斯同禾仙夏鬥法好精彩。(Getty Images)
「球王」美斯嘅世盃之旅再寫新篇章，周六(4日)朝早32強賽事，美斯同佛得角門將禾仙夏大鬥法，上半場再獻精彩入波，帶領阿根廷喺兩度被追平下，加時3比2險勝佛得角。美斯繼續刷新世盃入球紀錄，跨屆連續8場入波前無古人，累積入球增加至20球，今屆亦以7球排射手榜榜首。佛得角今場表現贏盡掌聲，雖敗猶榮。
39歲嘅美斯抖完後復任正選，個人第30次喺世盃披甲，阿根廷對住佛得角完全控制戰局，睇住嚟踢速度唔算太快，希望靠細膩組織撕破防線。15分鐘美斯禁區內搵到空位，起左腳射門斜出；1分鐘後美斯禁區外博到罰球，佢親自處理但射得太正，佛得角門將禾仙夏一抱入懷。
神奇時刻喺29分鐘出現，利辛度馬天尼斯後場放長傳，美斯突破越位接應，一控一射都妙到毫巔，近柱射破禾仙夏五指關，跨屆連續5場世盃淘汰賽入波，係66年世盃有紀錄以來第1人。完半場前安素費南迪斯割草式勁射，被禾仙夏瞓身撲出。
下半場阿根廷收晒油，被佛得角反壓受到唔少壓力，53分鐘迪萊杜亞迪遠射考驗達米安馬天尼斯，已為阿根廷響起警號。59分鐘佛得角歷史性時刻，迪萊杜亞迪接應賴恩文迪斯妙傳，禁區內無人看管下窄角度射入，神奇追平1比1。
阿根廷如夢初醒，行軍速度即刻加快，39歲嘅美斯同40歲嘅禾仙夏鬥法相當精彩。美斯63分鐘有單刀機會，但被禾仙夏神勇救出。71分鐘美斯禁區頂再博到罰球，佢選擇快開射向死角，排緊人牆嘅禾仙夏及時飛身撲出。尾段阿根廷狂攻，美斯補時5分鐘再喺禁區頂罰球射穿人牆，仍然逃唔過禾仙夏。
阿根廷喺加時2分鐘即入波，阿歷斯麥亞里士打開角球，利辛度馬天尼斯遠柱接應後狂抽破網；以為佛得角會洩氣，103分鐘薛尼卡巴爾右路轟入世界波，意外追成2比2平手。111分鐘阿根廷再靠美斯開角球，逼到佛得角球員擺烏龍，阿根廷第3次領先下終於保住勝局，16強會面對另一非洲球隊埃及。
免費玩Game、砌最強11人，一鍵share畀FD子打牙骹：
本文作轉載及備份之用 來源 source: http://hk.on.cc
|
鍾意就快D Share啦！
|
|
|
