美斯兩次助攻帶領阿根廷入決賽。(Getty Images)
世盃決賽戲碼出爐，阿根廷將同西班牙合演夢幻決戰！阿根廷周四(16日)凌晨喺世盃4強，憑美斯最後階段交出2次神助攻，戲劇性2比1反勝宿敵英格蘭，連續2屆躋身世盃決賽，將同西班牙爭逐冠軍寶座，「球王」美斯衞冕美夢仲差1步。
英格蘭今場變陣，兩閘換上列斯占士同迪積史賓斯，摩根羅渣士出任右翼。兩隊一開波就激烈埋牙，阿根廷球員連續嘅超技術犯規同小動作，即刻引出火藥味，球員多次爭執；雙方各不相讓，前場高壓逼搶同硬淨出腳，令頭半個鐘頭成為拉鋸戰，空有纏鬥而組織欠奉，未有製造任何射門機會。
33分鐘英格蘭靠罰球製造第1次攻門，史東斯接應迪格蘭賴斯傳送，力壓對手頭槌頂斜。37分鐘艾利洛安達臣喺中場踢跌美斯，拎到今場首張黃牌，阿根廷球員又起閧引起混亂，之後嘅罰球美斯射門被閂，安素費南迪斯再遠射越楣而去。上半場兩隊合共有19次犯規，但就連一次中目標攻門都冇。
換邊後阿根廷入局快，祖利安艾華利斯右路窄位抽射被擋出。55分鐘英格蘭打破僵局，哈利卡尼後場長傳，阿根廷解圍不遠，迪格蘭賴斯搶到後傳畀右路摩根羅渣士傳中，安東尼哥頓遠柱入楔近門掃入。阿根廷之後用兩翼傳中轟炸，69分鐘美斯右路出波，尼高拉斯干沙利斯門前迎頂，比克福特反應快撲出。
75分鐘阿歷斯麥亞里士打接應迪保羅傳中，插水式頭槌頂中柱；85分鐘英格蘭終於頂唔住，阿根廷角球組織，安素費南迪斯接應美斯傳送後，禁區外遠射追平1比1。補時2分鐘經典出現，美斯右路精彩傳中，拿達路馬天尼斯近門頂入，戲劇性反勝英格蘭入決賽。
免費玩game、1日狂爆11張卡！一鍵share畀朋友一齊玩：
本文作轉載及備份之用 來源 source: http://hk.on.cc
|
鍾意就快D Share啦！
|
|
|
