歌手陳奕迅（Eason）、楊千嬅及梁漢文近日合體受訪，Eason自爆早年拍攝唱片封面時皆素顏上陣，又曾試過被高層要求將已錄好的歌曲拱手相讓給梁漢文，揚言：「呢一世都記得！」
「華星三寶」Eason、楊千嬅及梁漢文繼之前在訪談中談及當年相處趣事後，又大談音樂製作的幕後故事。Eason透露拍攝唱片封套的過程相當過癮，憶述1997年為《與我常在》拍攝封面時妝化服全無，他說：「公司叫我着件白Tee同買條牛仔褲嚟就得，冇化妝、冇整頭，因為啲錢去晒音樂製作。」甚至他當時穿着的衫及鞋都是攝影師文念中即場脫下提供。到了拍攝《我的快樂時代》封面時，雖然Eason化了全妝，但最後仍以素顏上陣：「嗰日喺一間小學影相，我化咗妝，但個妝好厚，塊臉好腫，攝影師話我同你一齊跑30個圈，跑到所有妝甩晒，冇晒水腫。」又揚言若現時有攝影師叫他跑30圈，他仍會照做。
問到3人有否爭過同一首歌？Eason即笑笑口謂：「我有，我錄過一首歌，係後來梁漢文出嘅歌，呢一世都記得。嗰首歌叫《我需要的只是愛》，首歌我錄咗、混埋音，後來高層同我講呢首歌啱梁漢文多啲，佢唱歌能量再大啲，個阿頭同我咁講，咁都冇辦法，其實冇所謂。」梁漢文坦言事件在他完全不知情下發生，叫對方不要恨他。
自覺歌聲成瑕疵
談到最喜歡對方的歌曲，千嬅首選Eason的《傷信》，梁漢文亦表認同，然而Eason當年對此曲甚為抗拒：「如果當年我出《傷信》嘅時候你哋咁樣講，我會話你哋攞去我唔係唔鍾意呢首歌，我覺得西村由紀江嘅鋼琴獨奏版已經好好聽，你就唔好加啲人聲去破壞佢，我當時覺得自己係破壞咗首歌，但依家冇咁諗。後來有次去日本做演唱會，西村入我後台同我打招呼，我不知幾開心。」千嬅笑追問對方：「咁當年有冇講你個故事畀佢聽呀？」Eason即時凹水說：「冇！」令大家爆笑！
本文作轉載及備份之用 來源 source: http://hk.on.cc
|
鍾意就快D Share啦！
|
|
|
