無綫另類寫實劇集《非份之罪》昨晚（9日）播映的單元《一億殺機》，由陳煒、徐榮、施焯日、盧宛茵、李家鼎等主演，眾演員於劇中發揮演技，加上劇情夠癲夠破格，播出後網上引發極大回響，網民大讚TVB拍出了大膽又新鮮的題材：「好耐冇睇過咁癲嘅TVB劇，好睇！刺激！」、「故事推進節奏明快」、「個孫竟然係鼎爺個仔，真係估唔到」、「走出一貫 TVB劇框框」、「真實事件改編後更懸疑，好有追看性」等，口碑甚佳。
昨晚一集中獲得最多掌聲的絕對是飾演「毒舌惡新抱」的陳煒及奶奶與盧宛茵的連場激烈鬧交戲，兩人各自施展渾身解數，以極盡八婆嘴臉、盧宛茵（Madam）一咪嘴藐藐，鬼咁忟憎、一個嘴藐藐，而陳煒則面目猙獰兼叉晒腰，齊齊上演連場「六國大封相」，其中陳煒冷笑及咬牙切齒的表情，配以啜核非常的毒舌對白：「做咩呀？唔忿氣呀？你咪落去地府搵老爺追究問責囉！」簡直是一等一「惡女天花板」。
陳煒受訪時坦言拍攝「日嘈夜嘈」的戲份真的很攰，她謂：「真係鬧到好攰，同埋其實要鬧同打Madam都好擔心，因為佢始終係前輩，平時我對佢都好恭敬。」雖然惡得出位，但不少網民留意到煒哥對住親生仔施焯日時，卻能完全展現溫柔狀態，大讚她忠又得、奸又得、硬又得、溫柔又得，加上顏值身材兼備，網民洗版式力推她榮膺今年視后。
此外，昨晚最焦點場口，分別為過於李家鼎對着煩爆老婆盧宛茵的「爆血管式瘋狂咆哮」，以及盧宛茵得知老公與陳煒出軌後、衝入殮房怒摑屍體一幕，網民大讚拍得逼真及超出預期。另外，李家鼎向新抱「霸王硬上弓」一幕，亦在網上引起熱議，網民對鼎爺接拍床戲大感新鮮！陳煒亦大爆與李家鼎拍攝這場床戲時，對方緊張到要吃鎮靜劑：「佢同我講話佢一介武夫，從來冇拍過床戲，超驚！所以搞到心跳手震，要食鎮靜劑先掂。所以我拍嗰陣都唔可以太緊張，如果唔係佢仲驚。」
而除了陳煒、盧宛茵及李家鼎外，飾演智障兩父子的徐榮及施焯日亦贏盡好評，出名童顏的施焯日，拍攝時由於只得22歲，樣子比現時更年輕、青澀，可愛的甜笑及酒粒，再加上清純無雜質的雙眼，與劇中低智商又善良的「聰B」完全合配，難怪監製王心慰開劇前鼓勵他做番自己便可。至於徐榮飾演的張宏智(阿智)，短短一集已成功令觀眾清晰知道這位只有8歲智商的「大朋友仔」熱愛蝸牛及畫畫，天性純真，經常與「阿仔」施焯日玩得開心過小朋友之餘，又十分喜歡自己老婆仔，時不時會要求錫錫，簡單直接！
徐榮受訪時坦言難度頗高：「因為我之前都有演過智障人士，所以我今次都要諗啲唔同嘅演繹方法，希望出嚟有新嘅感覺畀觀眾。」由於阿智除了僅得8歲智商，還是肌肉萎縮症及腦痙攣患者，故在劇中不時會有抽搐及顫抖等動作，徐榮坦言演繹時頗吃力，更試過演到頸抽筋。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
