圈中模範情侶楊明與莊思明將於後日拉埋天窗，結束10年愛情長跑。二人歷盡風風雨雨，思明坦言自己仍願意留低，證明楊明是值得依靠之人，楊明則笑指全因思明「不要臉」愛的回應，令他死心塌地。兩人最後許下愛的承諾，由「每日一鬧」變成「隔日一鬧」，搞笑又深情！
藝人楊明與莊思明拍拖10載，經歷不少風雨仍愛得堅定，二人將於後日在馬來西亞吉隆坡JW萬豪酒店舉行盛大婚禮，結束愛情長跑，加上楊明的燒臘店剛剛在當地開業，可謂雙喜臨門！思明身為拿督女兒，婚禮自然甚有排場，他們早於吉隆坡籌備婚禮，更豪花百萬拍了多輯浪漫又華麗的婚照，除了日前公開在上海取景的美照外，二人在吉隆坡地標蘇丹阿都沙末大廈拍攝的唯美婚照亦率先曝光，幸福之情不言而喻。
求婚遭「出賣」零驚喜
楊明與思明日前接受本報獨家訪問，談到求婚過程又氣又無奈，楊明本打算在好友見證下，於二人喜愛的餐廳求婚，惟身邊友人將他買戒指及求婚大計全部「劇透」給思明，頓時驚喜全無，思明直言：「其實個朋友同我講嗰刻好嬲，冇晒驚喜，我明白佢好戥我開心，一知道消息就第一時間同我講，佢係好心做壞事囉！」楊明坦言早已視女友為結婚對象，2018年已打算求婚：「疫情前已經想求婚，但當時遇正疫情，加上入組拍《愛．回家開心速遞》，時間上配合唔到。」如今可謂集齊天時地利人和，當中最大契機竟然是家中愛犬，楊明表示：「因為隻狗今年10歲，我哋同狗狗影咗輯生日相紀念，輯相出咗嚟，大家都覺得我哋係咪結婚呢，加上拍拖10周年都諗住搞個派對，咁反正搞，不如結婚，而且工作時間上又夾到。」
二人相愛10年，攜手走過高山低谷，思明大讚楊明性格樂觀又孝順，為人可靠及顧家，面對逆境從不自怨自艾，是可以託付終生的人，她說：「點解知道可以同呢個人走得遠？喺大家經歷低潮時，佢冇走，我又喺度，如果要走，大家有好多唔同時刻可以走，我留得喺度，呢個人一定係值得。」楊明則欣賞莊思明重情義及心地善良，對家人照顧有加，除了感激對方不離不棄外，思明「愛的回應」更令他死心塌地：「有段時間我離開香港好多個月，對佢好牽腸掛肚，個人開始唔理智，喺網上寫咗好多肉麻嘅嘢畀佢，一般人都唔會回應，但佢又好唔要面咁喺網上回應我，令我好感動又開心，應該好少娛樂圈情侶會咁旁若無人，哈哈！」
約定隔日鬧一次
不過，情侶間相處除了甜蜜外，亦少不了磨合，思明大方承認曾多次萌生分手念頭：「覺得好攰同好委屈，好似點極都唔明咁，覺得對方唔珍惜，搞到自己好忟，但係我瞓醒一覺就會唔記得。」她直指最受不了男友的「超級拖延症」，楊明笑言：「佢鬧人好惡，佢每日都鬧我，但佢好快冇事，咁我就冇事囉。佢係火水，一點就着。」又大爆：「希望佢鬧少啲我，呢個就係我最大心願。」
大婚在即，兩人許下愛的承諾，楊明認真表示：「我一定會用盡我最大努力，畢生照顧你。」思明揚言會守護對方的健康，並少發脾氣，楊明聞言乘勝追擊：「你喺觀眾面前承諾鬧少啲我，忍讓多啲我，有咩事吞咗佢。」但思明不肯妥協：「吞唔到好多啖喎！」楊明極速讓步：「你咁快反悔，咁可唔可以唔好每日鬧我。」最後兩人約定：「隔日先鬧一次。」他們由情深變為「小學雞」鬥嘴模式，場面搞笑又溫馨，正正反映出兩人獨特的相處之道。
場地：ODDS（中環）
本文作轉載及備份之用 來源 source: http://hk.on.cc
|
鍾意就快D Share啦！
|
|
|
