談及產後的身體變化，蔡嘉欣笑言雙腳水腫情況嚴重，至今仍有不少鞋子穿不下。她更打趣地表示，早前看到自己拍攝的YouTube影片時，連自己都覺得面貌變化極大：「我自己睇返都覺得變咗樣啊！甚至有網民問我係咪整咗容，以為係第二個人。因為我以前眼底裝得落兩條芝士腸，產後腫到好似雞蛋咁，把聲又唔同咗，真係誇張！但我當時仲好有自信咁擺片上網，點知大家話醜樣到唔認得我。不過我都明白，因為開刀要吊鹽水，又輸咗好多血，循環變得很差，好多液體留在身體入面。」蔡嘉欣透露，經過一段時間喝中藥調理身體後，目前水腫情況已大為改善，正逐步恢復最佳狀態。
懷孕期驚現逾300粒疣 為護孩子安全放棄餵母乳
被問到有否為囝囝餵人奶，蔡嘉欣忍痛大爆未能餵人奶慘痛真相。她透露自己在懷孕5至6個月時，全身突然爆發出大量的HPV病毒疣，數量多達300多粒，令她大受打擊：「我懷孕前一粒都冇，但懷孕中期突然發現頸部全是一粒粒，再仔細睇，發現前面個身加埋居然有成300幾粒！可能係免疫力出現問題。因為呢啲疣係有傳染性嘅，我唔想影響到BB，所以最後決定唔餵母乳。」
她續指，現時正分批進行脫疣療程，並需要塗抹抗生素藥膏及服藥。為了防止病毒傳染給初生兒子，她日常與寶寶接觸時亦相當謹慎：「平時抱佢或者靠近佢，我都一定會隔住條毛巾，避免直接接觸到皮膚。連我老公都開始發現有少少，所以屋企洗衫都要用高溫去洗，毛巾都要分開使用。」
家事親力親為 盼與丈夫溝通再追二胎
雖然照顧孩子與應付身體狀況相當繁重，但蔡嘉欣表示現時心情十分愉快，看著新生命成長，感覺像是重獲新生。談到家庭分工，她笑指自己是家中的「照顧者」，而老公則是「王子」：我平時做嘅嘢比老公多，好似餵夜奶、抱佢瞓覺都係我做。有次我叫老公幫手餵奶，佢居然問我：『我餵奶可以，但邊個負責遞個奶瓶畀我？』真係笑死我！不過佢都算係有心幫手嘅。」
被問及是否有意再添丁，蔡嘉欣坦言自己非常希望生兩個孩子，讓大仔有個伴，不過目前與老公尚未達成共識：「我想生多個呀！但老公目前仲未肯，可能佢覺得照顧小朋友壓力大。男士需要時間消化下，我打算觀察佢一年，再慢慢同佢傾，希望最後可以打動佢」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
