MIRROR成員Anson Lo（AL）連日來為新劇港版《金秘書為何那樣》拍攝，早前有網民指其「霸總」造型雙腿比例過分修長，質疑他穿增高鞋墊。日前他繼續「長腿上陣」在土瓜灣取景，連身形已不算嬌小的拍檔Ivy So亦要踩木箱才能配合他的高度。而Ivy前晚出席慶生活動時，大談與AL的多場咀戲，自爆有「唇炎」嘴唇發腫。
近日Anson Lo密鑼緊鼓翻拍人氣韓劇《金秘書為何那樣》，連日四出取景的他，日前與女主角COLLAR成員Ivy So在土瓜灣附近的海旁拍攝談情戲。劇中飾演自戀霸道總裁「李英俊」的AL，早前被網民拍得他一身型爆打扮，卻被指雙腿比例離奇修長，極不自然，紛紛質疑：「佢對腳好似假腳」、「睇得出佢鞋墊相當高」，暗指有「加工」之嫌。
拍攝當日，AL以一身深藍色3件頭西裝配金框眼鏡亮相，盡顯氣場之餘，一雙長腿依然極為搶眼。劇情講述他步向站在碼頭的「金秘書」Ivy So，貼心為她披上外套，其後甜蜜蜜談情，頭貼頭煙韌放閃。現場所見，Ivy So要站在木箱上才可配合AL的高度，由於要多角度拍攝，兩人重演了多次談情戲，NG時AL忍不住邊大笑邊步回原位，而兩人空檔時有講有笑，默契十足。
及至中段突然下微雨，每次拍攝後，工作人員即為兩人舉傘，AL被雨點撇到臉時一度皺眉兼扁嘴。拍攝結束後，他獲經理人花姐親自打傘，沿路看見在場等待的「神徒」時，他即親切揮手道別才上車離開。
薄荷之吻愈錫愈凍
AL為了此劇可謂全力以赴，連日在社交網貼出晨早出發往劇組，至凌晨才完成拍攝兼在車上補眠的照片，他又為Keep住身形而嚴控飲食，每餐都是水煮雞胸肉、水煮蛋及白烚西蘭花等，極為清淡。不過，對自己嚴苛的他對劇組則甚好，不時「萬歲」並說：「呢幾日大家落住雨拍街景辛苦晒！」獲網民大讚貼心。
至於前日迎來25歲生日的Ivy So，在活動中獲粉絲慶生，她大爆AL非常自律，為稍後的除衫戲嚴控身材，經常空肚飲至少4杯齋啡：「我話你有冇事㗎？會唔會暈咗㗎！」談到早前在粉絲圍觀下在街頭拍咀戲，她坦言一開始相當驚：「因為佢背住好多Fans，我又對住好多鏡頭，但Roll機都冇乜嘢，佢哋好Nice。」並透露稍後會拍攝在AL家中梳化的激咀場口，笑說：「依家熟咗，咀戲就會易啲。」
不過，由於每日只睡3、4小時，她因免疫力低致唇炎，嘴唇發腫，又自爆拍咀戲前刷牙而被AL取笑：「佢係咁笑我，問我做乜要刷牙，呢個係禮儀嚟㗎嘛！佢話佢食咗薄荷糖就OK。」兩人已拍了原劇的名場面「衣櫃之吻」，從不同角度拍了8至10次，她笑說：「薄荷味好強，愈錫愈凍！」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
