藝人楊明與莊思明本月2日於馬來西亞舉行盛大婚禮，結束10年愛情長跑，近200位香港好友親身飛到當地見證二人大喜日子，場面盛大！
完成婚禮後二人今日（6日）飛返香港，約下午5時40分，楊明與太太莊思明甜蜜現身香港機場，問到完成人生大事是否輕鬆了不少時，莊思明感恩婚禮順利完成，笑言之前籌備工作反而讓她「緊張到忟」，因不少朋友也是首次到吉隆坡，最擔心接送出錯令賓客感徬徨，感激老公落力安排未有出現甩漏，楊明也坦言這是讓他最感壓力的一環，幸一切順利未有待慢賓客，又感激大家特意放下工作，親身飛到當地見證他們的大日子。
談到婚禮充滿感人場面，二人表示最讓他們最感動的是現場播出思明爸爸的AI片段，莊思明説：「我諗最多人覺得感動就係條AI片，我哋都係當晚先第一次睇！係令我喊得最『甘』，之後就忙住換衫都冇時間再喊，哈哈！」他們表示之前一直有追問負責短片的團隊，希望可先過目成品，但笑指對方因想捕捉他們第一反應，叫他們「唔好咁心急」。
提到為婚禮擔任司儀的胞姊莊思敏似乎比他們更緊張，竟將「合法丈夫」錯口説成「合法妻子」，莊思明笑謂：「佢前一日都有同朋友講好緊張，唔緊要啦，我覺得有啲蝦碌嘢，第日睇返都可以笑吓，最好笑佢搞到黃建東都緊張埋。」
說到之後於香港舉行的婚宴，莊思明表示希望以派對形式進行：「方便大家之餘我哋又冇咁大壓力，同埋預備人數會再多啲，如果飲宴形式都諗唔到邊度可以擺咁多圍。（會想快搞？）抖一陣先，哈哈！」楊明表示香港婚宴場地向來供應緊張，先定好場地、形式，日子再作決定，問到是否先忙造人大計？他表示一切順從天意：「睇吓個天會唔會送啲禮物畀我哋，我哋覺得一男一女就夠，最少都兩個。」正式升呢人夫外，楊明於馬來西亞投資的燒臘店亦即將開業，可謂雙喜臨門，他表示稍後會再飛當地處理新店開幕，預計這段時間要兩邊飛，應付工作和生意，問到何時度蜜月？莊思明表示仍未計劃，坦言平日得幾天假期，多以亞洲為旅遊目的地，難得度蜜月會希望到歐洲：「好耐冇凍過，想去凍啲嘅地方。（習慣人叫楊太未？）都習慣，始終一齊咁耐，啲朋友都有時會叫。（老公叫老婆呢？）佢都係嗌緊我肥妹，Ok嘅，哈哈！」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
