高鈞賢用AI湊女親力親為
早前因愛女與鄰居引發網絡熱議的高鈞賢，私下原來是個「神隊友」。他化身「科技奶爸」善用AI幫手湊女，由餵奶、掃風到換尿片通通親力親為：「有咩就上網問AI，好有用！」提到湊女心經，他透露Liona初期曾遭遇嘔奶危機，試足4、5款奶粉都冇用，一度擔心是乳糖敏感，幸最終轉用美國奶粉順利解圍。講到生育計畫，高鈞賢斬釘截鐵表示「生一個夠晒數」，將心思全放在女兒身上。他笑言Liona個性獨立又勇敢，儼如「大女主」，平時最愛攀高攀低，故屋企已做足安全措施，實行「開放式教養」任跌任跑，藉此提升愛女的自我保護意識。
寧推過百萬劇約帶埋愛女吸金賺奶粉錢
轉眼間Liona已1歲半，高鈞賢為了不錯過女兒的黃金成長期，除了將星期日定為「絕對家庭日」，更不惜推掉多套劇集，寧願少賺過百萬酬勞：「陪伴先係最重要！現時工作重心會放喺自己嘅娛樂公司同做直播，希望可以陪到佢10歲，咁就無憾。」雖然「損手」推工作，但愛女好運帶水，一家三口獲青睞接拍親子廣告，Liona小小年紀已經幫手賺奶粉錢，非常吸金。
豪擲2,250萬鋪路名校培育「谷愛凌」
愛女心切的高鈞賢早前更豪擲2,250萬元，入手九龍塘老牌豪宅「畢架山一號」3房單位，一早為女兒鋪好升學路：「已經計劃好佢讀咩幼稚園同小學。」不過他亦補充，最重要是愛女健康快樂，「讀到書就讀」。熱愛運動的他更寄望女兒承傳運動員細胞：「The magic is in the work，希望佢可以成為運動員，好似谷愛凌咁。」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
