英國男星亨利卡維爾（Henry Cavill）聯同《殺神John Wick》系列名導Chad Stahelski，近日在香港拍攝荷里活奇幻動作電影、新版《挑戰者》（Highlander），獲憑《九龍城寨之圍城》二度斬獲香港電影金像獎最佳動作設計嘅谷垣健治團隊協助拍攝。尋日（16日）到今日（17日）凌晨晚再到中環拍攝，今次就去到中環中心一角，搭出Disco場景畀多位演員勁歌熱舞，「超人」就似係入去搵人嘅劇情。都有參與拍攝嘅武打巨星張晉被發現同藝人太太蔡少芬身處中環中心一間Coffee shop撳緊電話休息，隨後二人分別搭電梯落樓去拍攝Disco戲份。張晉去年曾經歷突發心臟病險死，最後需要緊急做「通波仔」手術保命，大病初愈嘅佢今次就獲蔡少芬全程貼身陪住老公拍戲。
去到凌晨12點多，亨利於機利文新街繼續拍攝，見佢手上揸刀，身上滿布傷痕、步伐似就受傷般，於布滿臨時演員街上漫步，街道亦都被布置成舊式香港擺設，同時現場見到有燈牌寫上「2040」字樣。到凌晨3點半，團隊再轉戰德輔道中電車路拍攝亨利險遭車撞場面，亨利繼續以滿身傷痕及西裝褸捲大刀，以虛脫姿態走出馬路，險被的士撞到。同時張晉以半古裝造型現身，拍攝以武功幫亨利泊停架的士。拍攝此戲份時，蔡少芬一直與工作人員傾偈兼睇實老公，繼續貼身傍實。
拍攝於凌晨5點半完成，全體工作人員拍手慶賀。現場見到荷里活金牌武術指導兼演員林迪安，帶同愛女、《聲夢傳奇》歌手林沚羿（Venus）到場探班，亨利亦走近同二人合照，亨利再同張晉及蔡少芬合照，似係亨利香港場景拍攝煞科。惟林沚羿將現場合照及拍下嘅現場拍攝片段放上網，未知會否侵害電影保密協議。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
