已故天后梅艷芳母親梅覃美金（梅媽）昨晨（30日）離世，享年102歲。梅艷芳兄長梅啟明明下午於醫院外見記者，已語帶不滿表示竟然要由傳媒口中才得知母親出事，強調會以兒子身份負責梅媽身後事，將用梅艷芳信託基金為梅媽風光大葬。不過，尋日同樣現身醫院嘅梅媽生前好友潘小文，表示梅媽一早已經立好遺囑及安排自己的後事，將交由孫兒處理，稱梅啟明冇資格：「Auntie（梅媽）生前已經同呢個人脫離咗關係，佢有權做任何嘢嘅，但係家屬嘅意願係希望低調，同埋Auntie生前亦都立咗遺囑，已經安排咗自己嘅後事，明白梅啟明先生嘅心情，但係都希望佢尊重家屬嘅意願。」
惟梅啟明對潘小文說法不屑一顧：「呢個唔需要理會佢，孫就係孫，仔就係仔，再加上佢係冇權去處理任何嘢，佢話有遺囑，冇用嘅，我會處理，搞咗啲有關嘅嘢先。」問到若法律上判定潘小文口中嘅梅媽遺囑有效，會否遵從遺囑上梅媽意願？梅啟明揚言搵律師處理：「咁我咪又搵律師處理囉，我一定唔會畀佢咩。根本嚟講，佢冇資格同我處理呢樣嘢，佢喺阿媽身邊就唔會令到老人家死呢個係好嚴重嘅問題！」現時梅啟明一方與梅媽孫兒及潘小文一方各執一詞爭後事舉辦權？佢重申：「唔緊要㗎，一，佢冇資格同我爭，二，喺法律上佢更加冇，如果講遺囑我更加要去爭取。」
問到若孫兒及潘小文低調、保密處理後事，連梅啟明都全不知情？佢信心十足認為根本不可能低調：「冇冇冇冇冇，呢啲唔係佢處理嘅問題， no，no，依家我都知啦，點唔畀我知？我聽朝就去處理嗰啲嘢，因為要攞咗證件嗰啲嘢之後先處理，再唔啱我都去搵律師發禁制令，禁晒所有嘢，冇得郁。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
