古天樂入行以來首個演唱會《MY FIRST SHOW》一連兩晚在紅館舉行，昨晚（22日）尾場完滿落幕，兩場演唱會嘉賓陣容星光熠熠，觀眾睇得開心，而古仔台上台下好感動，並多次哽咽。尾場嘉賓分別有組合農夫、張繼聰、Winka、Ansonbean、林峯、胡子彤、宣萱、馮德倫和草蜢。古仔並宣布8月29、30移師澳門繼續唱。
演唱會開始古仔從天而降出場，唱出《世紀大騙局》和《Mr.Cool》之後同農夫合唱，C君表示第一晚睇得好開心：「估不到坐羅家英身邊，睇Liza姐（汪明荃）表演，我想講你老婆幾正！」但爆羅家英只掛住自拍。又叫大家千萬不要讓古仔玩貓，因為有可能會走失，問古仔今晚賣點是甚麼？古仔搞Gag：「My First Show！」送走古仔後，農夫表示下次將到他們開紅館四面台。唱《天真》時古仔走到觀眾席握手，多次被人拉着不放，他笑言：「懷疑手骹甩咗！」
張繼聰表示記得1994年看到由古天樂主演的劇集《婚姻物語》，當時被「白雪雪、有酒窩、紅唇、老牛聲」的古仔吸引而「沉船」，自此成為Fans：「佢係萬人迷，但冇停低好努力，成為電視台視帝，加入影壇繼續冇停低努力成為影帝，到樂壇佢冇努力，一直停低，最後攞『我最喜愛男歌手』同埋開埋紅館。」全場爆笑。笑言自己有樣叻過對方，就是可以開《人夫集團》。
林峯連續兩晚做嘉賓，昨晚與胡子彤和古子大唱《跳舞街》《最緊要好玩》和《Monica》，因為這3首歌出現過《九龍城寨之圍城》，林峯表示與古仔相識20多年，希望老闆的演唱會是音樂旅程的開始，有問過做不做巡迴，笑言「人生未見過佢跳咁多舞。」並透露剛完成《九龍城寨之終章》拍攝工作。
古仔曾走上「半山」，走到狄波拉身邊合唱。之後乘坐飛船環繞山頂漫遊紅館，與觀眾拉近距離。古仔和宣萱唱完《無時空之戀》，馮德倫加入3人合唱《紀念日》古仔早前與馮德輪拍攝搞笑片，大玩「要節能」「馮德輪」。
古仔發現台下有舊朋友吳家樂，原來他們曾是電視台「新五虎」，之後他們聯同電視台「五美」姚瑩瑩和傅明憲，大合照重聚。古仔唱完《天命最高》後台上哽咽，良久未能說話，他表示入行33年，好似張繼聰所講好努力去做電影，唯獨唱歌冇做好：「今次有機會開紅館係神奇的一天，平時做完演唱會嘉賓坐台下睇，未試過企台上，舞台好親切，同你哋距離好接近，唔遠，我一定要同你哋好接近，好清楚大家諗法因為《並肩同行》。」他希望演唱會好似開派對一樣，大家開開心心。古仔在台上click一click幸未有跌倒，直言最擔心跳舞環節，試過半夜3、4點打給排舞老師研究，音樂總監徐浩也是經常收古仔電話。
古仔與草蜢演唱多首快歌Medley，又唱又跳，古仔表示蔡一智是他的教練，幫助他操練肌肉，蔡一智大讚古仔跳舞好靈活，希望古仔快些推出快歌，知道古仔8月底澳門開騷，而草蜢亦將於10月在澳門開唱，問古仔：「到時你會唔會做我哋嘉賓呢？」古仔一口答應。
演唱會尾聲，古仔演唱最後一part Medley，且邊跳綱管舞，加添難度，唱完《今期流行》，觀眾依然不肯離開。之後古仔再次出場，向着四面觀眾逐一揮手，他再次哽咽：「你哋太好，真係多謝，我會記住呢刻畫面，銘記於心。」最後唱出哥哥張國榮的《風再起時》演唱會晚上11時27分結束。
騷後古仔開香檳慶祝，心情興奮派心及派飛吻，表示開騷前好冷靜，尾場就虛脫。他說只想做一個最好的演唱會，所以由7月起，每晚煩着團隊每一個人，希望盡力做到最好。問是否盡力冇悔？沒有演唱會無悔，因為一定有缺點，只想做好一件事，無論遇到甚麽困難，要相信自己能夠做好。他坦言因為好感動，忍不住哽咽，最後一首歌揀《風再起時》是因為哥哥離開樂壇時唱這首歌。說到此時，古仔再次哽咽：「佢（哥哥）喺我心目中有一個好重要位置，我唔知仲有冇機會開第二次演唱會，可能今晚係暫別。」古仔兩場演唱會邀請的嘉賓在他心中都好重要，特別首場的汪明荃，30年前曾為阿姐伴舞，估不到如今與阿姐在紅館對唱，開心無憾。並大讚阿姐綵排時好認真：「阿姐開騷前好早到，同我媽傾咗半個鐘，因為阿姐係我媽偶像。」
古仔演唱會唱了多首哥哥的歌，他表示好多謝及想致敬哥哥，對樂壇的貢獻。他說每個人生都有個舞台，要享受，不應該害怕，要相信，不應該擔憂和面對。今次跳戰鋼管舞，會否愈跳愈上癮？他笑言跳舞不會上癮，主要想跳出氣氛，令觀眾開心。
古仔表示演唱會第一樣要求是要同觀眾接觸多些，拉近台前半山和山頂的觀眾距離，問會否開巡迴？他表示並非他決定，笑言：「呢刻最想一覺瞓到下午，因為好攰，（有冇睇網民意見？）開完第一場瓜咁滯，所以睇唔到咁多。」完成紅館夢令他更加相信人是需要努力，更加相信自己及多與人接觸。古仔演唱會其中一套歌衫乃出自王嘉爾手筆，他就希望對方以後多些返香港表演。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
