利辛度馬天尼斯又擺烏龍。(Getty Images)
英超開季成績差勁嘅曼聯，周日(20日)作客富咸繼續失分，「烏龍王」利辛度馬天尼斯騎呢送大禮，雖然馬菲奧斯根夏喺最後1分鐘幸運折射追平1比1，但曼聯開季5場聯賽只得5分，仍然係「紅魔鬼」史上最差開季。賽後領隊卡域克堅稱曼聯方向正確，將會繼續進步。
曼聯上半場同富咸鬥攻，合共出現今季最高嘅26次射門，最有威脅係般奴費南迪斯射中柱。63分鐘富咸率先入波，當時伊禾比殺入禁區起腳，曼聯門將拿文斯用腳閂出，點知回防嘅馬天尼斯伸腳一攔，直接將個波踢入自己大門。呢位阿根廷國腳累積3次英超擺烏龍，成為曼聯史上「烏龍王」。
富咸領先之後專注防守，令曼聯老鼠拉龜，直到完場前1分鐘，馬菲奧斯根夏左路起腳遠射，個波省中人後改變方向收死賓特尼奴，幫「紅魔鬼」執番1分。Opta數據顯示，曼聯開季5場聯賽得5分(1勝2和2負)，追平14/15球季嘅英超頭5輪最低得分隊史紀錄。
曼聯驚險逃過3連敗厄運，賽後被名宿加利尼維利批評「曼聯史上最可悲演出」，不過卡域克就表示：「我唔覺得球員體能有問題，比賽最後階段氣勢好強。結果當然唔理想，我哋想贏，但呢個係團隊學習過程。今場結果可以完全唔同，我好滿意球員落後下嘅反應，對球隊未來前進會好有幫助。」
足球博彩神器，每日重心提供盡在《彩報》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|
