無綫戀綜《女神配對計劃2》今日（24日）在商場宣傳，原有的5位女神何沛珈、郭珮文、俞可程、陳若思及阮嘉敏，聯同隱藏女神梁超怡與陳星妤，跟12位求愛勇者出席，場面熱鬧。現場女神分別跟一位求愛勇者在限時內互動，男方要用盡辦法令女神心跳飆升。
其中「冷氣男神」方智弘（Oscar）最受歡迎，獲3位女神何沛珈、俞可程及陳星妤垂青，當中俞可程只是跟Oscar對視，心跳便由120多火速升至150，非常誇張，而Oscar要求攬攬陳星妤，女方則反客為主，要求聽對方心跳，把臉挨實Oscar。至於阮嘉敏則選中為她由西安追到香港的「短劇男神」吳旭東（東東），東東以「我嘅女神」來形容對方，並以廣東話向她表白：「今日見到你，我真係好開心，我好掛住你。」台下粉絲大讚兩人合襯。郭珮文就揀中前度俞鋆瑞（Icy），令全場起哄，Icy在對方耳邊細語，讚她是全世界最漂亮的女生。
Oscar、何沛珈及俞可程齊接受訪問，談到節目上4位女神同時爭奪Oscar，被網民戲稱是《Oscar配對計劃》，對此，Oscar謙稱：「真係抬舉，我有好多不足之處，我都自卑，經濟能力唔好，但我好開心。（你搞到大家爭風呷醋？）唔係，之前大家只係了解階段，依家了解深好多，但唔可以劇透。」談到在節目上跟陳星妤互動時心跳加速，他解釋事前不知節目組的安排，故整個人處於緊張狀態，加上少跟女朋友以外的女生有如此親密舉動，問到活動上陳星妤對他非常主動，他是否喜歡這類進擊女生？他坦言：「我會叮一下，我鍾意女霸總。」
對於節目由求愛勇者爭奪女神演變為女神爭勇者，何沛珈稱大家處於了解階段：「未係話幾個人一齊爭，之後個發展係好峰迴路轉，但唔可以劇透。」問到俞可程會否再主動一點？她自嘲：「我驚再主動會嚇親人，已經使盡我渾身解數，冇得再主動，都唔係話爭，只係大家傾吓偈開心吓。」對於部分網民狠批她「作狀」及「好姣」，她認為每個人有不同觀感，任何批評她都接受：「有啲人都話我好甜美，兩邊都睇，唔會只睇負評。（會唔會唔開心？）冇，大家只係喺其中一個鏡頭去了解我，未知我係點樣嘅人，相信佢哋睇落去會有唔同觀感。（網民話你似史力加老婆，你點睇？）都幾得意，網民好有創意，我都覺得幾似，惟有下次個妝化靚啲。」
提到何沛珈因在節目上轉軚揀Oscar而被網民鬧是綠茶婊，她說：「每個人都要有啲經歷，係學習過程，學習咗點去調整自己狀態，多謝大家關注呢個節目。（畀咁多網民抨擊，會唔會好大壓力？）因為係第一次，我已經調整好咗。」問到她自稱因太多負評而卸載其中一個社交平台，其後被網民發現有繼續使用，她解釋：「因為我有用另一個社交平台貼文，但呢個平台同我卸載嘅平台係互通，會將我寫嘅嘢自動上載兩個平台。（話你回應時，想喊但喊唔出？）我其實係多愁善感嘅人，但又同時想控制自己眼淚，鏡頭唔係好睇得出我有冇喊。（你話唔知咩係綠茶婊，畀網民勁鬧。）呢個字眼都存在好耐，冇可能無聽過，但我唔覺得自己係，當大家咁話我，我都開始懷疑自己，所以我先問人究竟綠茶婊係點？我係咪真係咁樣？身邊朋友覺得我唔係就得。」Oscar即時幫口：「佢係個爽直人，因為我哋有3個人連住嘅關係，網民有好多說話，唔好咁認真對待留言，最緊要係真實嘅人係點。（你覺得佢係唔係綠茶婊？）我覺得佢唔係。」他又承認自己是罪魁禍首令何沛珈被鬧，他霸氣地說：「希望大家唔好咁多攻擊性說話，大家要攻擊就攻擊我」俞可程也力撐何沛珈，指對方並非綠茶婊：「節目上佢好顧及我感受，網民咁話佢都只係心痛我哋同緊張個劇情，都唔需要咁，佢好錫我，係我大師姐。（佢係你競爭對手？）我哋唔會為啱啱識嘅人而咁，我選港姐時，佢係師姐帶我一齊拍外景，大家識咗兩年。」
同場，陳星妤被問於娛樂圈潛規則文化，她稱好彩地沒有在她身上發生過：「喺公司做嘢好安全，拍嘢時候都係通過唔同管理層、導演、經理人，好多人知道發生咩事，所以冇呢個情況。（被要求會點保護自己？）當然會用自己方法去保護自己，到時都係執生，女仔都會有基本保護自己方法。」問到之前拍《一舞傾城》時不乏激情戲，問她有否試過臨時加性感戲？她坦言：「冇，因為《一舞傾城》係出齊劇本先拍，大家有做圍讀，劇情都好透明，唔會臨時加額外場口。（要加接唔接受?）要睇新加場口係咪幫到劇本表達，唔係為加而加，如果有呢啲情況出現，都會同監製、導演傾，唔會盲目咁話好。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
