藝人吳卓羲與張曦雯的戀情傳了多時，昨日二人自緋聞後首度合體，為「定情劇」宣傳，合照時吳卓羲罕有顯得尷尬及怕醜，而張曦雯則一味甜笑。兩人「默認」戀情，着大家給予空間，又同聲表示準備好拍拖。
無綫台慶劇《璀璨之城》昨日舉行記者會，一眾演員大晒冷，包括張智霖（Chilam）、吳卓羲（Ron）、張曦雯（Kelly）、高海寧（高Ling）、江美儀、陳瀅、蔣祖曼、蔡一智、陳曉華及陳煒等，卡士強勁！當中緋聞情侶Ron與Kelly成為全場焦點，兩人劇中飾演夫妻，傳戲假情真，更一隻貓兩份養。現場兩人合照時，向來玩得的Ron被要求跟Kelly合力派心，竟罕有面露尷尬，連「男仔頭」的Kelly亦一臉害羞。
問到是否拍拖，兩人均未有否認，Ron叫大家先集中注意力睇劇：「劇入面我哋幾相愛！（現實中？）我哋唔拍戲時都好照顧大家，一齊食飯傾吓劇本，好多人嘅。（唔係單獨？）我哋又未敢。（但你想嘅？）想㗎！」Kelly亦「夫唱婦隨」甜笑表示想單獨約會，Ron即說：「畀啲空間我哋先！」問是否因拍劇而撻着，Kelly按照Ron口脗叫大家先看劇中愛情線，至於是否稍後公開，Ron笑說：「到時話畀你聽囉！收視好嘅話。」
談到Kelly家中新貓貓「冬菇」被指是跟Ron共同收養，她即宣示主權：「冬菇係屬於我嘅！我係佢第一個媽咪，佢暫時喺一個單親家庭中長大。」Ron亦表示只看過「冬菇」的照片，未見過真身。問到發展機會，Kelly對Ron讚不絕口：「佢好好，愛小動物、孝順，講唔晒。（準備好迎接新戀情？）都OK。」Ron亦直言：「我隨時準備好，隨緣。（同Kelly有緣？）冇緣點一齊拍戲。（覺得Kelly有咩優點？）溫柔、大方、又靚、心地又好、做戲又專業又有愛心，非常好！完美到極點。」
Chilam高海寧冇眼睇
同場的Chilam與高Ling在記者會上「食花生」，問到拍劇期間有否留意到Ron與Kelly有撻着迹象？Chilam即推給高Ling說：「我比較投入劇本上，你有冇發現到啲乜？」高Ling大耍太極：「你哋自己問佢哋，我乜都睇唔到。（冇同你分享？）我個角色枯萎緊，我要安慰自己個心靈，唔得閒望其他嘢。」劇中Chilam周旋在多個女人之間，他直言是夢寐以求：「現實生活邊有可能發生，個個都咁靚，老婆又正，情人又靚。（同太太備案？）佢話你拍得開心啲，返嚟就洗碗哈哈！」另外，對於兒子「魔童」休學之說，他澄清：「唔係休學，係Gap Year，尊重囝囝決定，太太冇嬲，支持佢搵自己夢想，如果佢有一日鍾意做幕前，我都會好支持佢，最重要唔好浪費每一秒。」
認去過土耳其 陳瀅避談JW秘婚
陳瀅與蔣祖曼（Joman）在劇中跟張智霖（Chilam）均有感情轇轕，陳瀅更自爆有大膽激情戲：「大膽到睇完個Final Edit後諗，仲會唔會有人娶我㗎！監製話『因為咁先有人娶妳。』（肉搏？）佢冇掂到我，我用演技同眼神挑逗佢。」至於Joman笑言雖然跟Chilam最多對手戲，但不幸地沒有親熱戲：「我哋只有打鬥，但佢係冇掂我嘅。」
談到好友王灝兒（JW）被爆去年11月在土耳其秘密結婚，問陳瀅有否恭喜對方？她即落閘說：「任何唔關我嘅事今日都唔回應。（有冇去土耳其？）我有去，但我喺土耳其冇參加婚禮，我係自己去旅行。（去年有冇參加婚禮？）去過幾個朋友嘅婚禮囉！（知唔知佢結婚？）人哋嘅嘢我唔答。」而Joman的好友唐寧遭經理人控告涉違反藝人合約兼被爆患重度抑鬱，她套用陳瀅的回應說：「人哋嘅嘢唔回答。」
蔡一智打女人 Cut機急補鑊
視后江美儀與組合草蜢成員蔡一智昨日現身宣傳，蔡一智透露在劇中做盡平日不會做的事：「每次導演嗌Cut機，我就會同對手講我平時唔係咁嘅人，哈哈！」除了跟女角有親密接觸外，他更會出手打她們，又有動作場口，故獲安排武術指導，直言拍得很過癮。
江美儀的角色同樣要打人，她說：「打張智霖、張曦雯，又打工人。（又做惡女？）唔係惡，係黐線，又要時真時假，好考工夫。」蔡一智指她是「鱷魚頭老襯底」，江美儀亦表示現實中經常被蝦，問是否指綜藝節目《試真D唷》拍檔吳業坤？她指對方與大家熟落後開始流露真實反應，但大家看到的都是節目效果，讚對方其實很Sweet。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
