女星惠英紅近日飛抵巴黎準備出席時裝周活動，豈料其團隊竟在當地遇劫，遭匪徒砸車窗爆竊，幸與隨行團隊都沒有受傷，但工作人員手袋被搶走，事發後團隊已第一時間報案並向大使館求助。然而今次巴黎時裝周多位藝人均有不同程度損失，內地女星萬千惠就自爆慘遭當街搶相機，香港代表倪晨曦更同時經歷被掟爆篋及行李失蹤，反映當地盜竊猖獗治安差，對旅客照顧不當等問題。
萬千惠受邀到法國巴黎參加品牌活動，與團隊於巴黎鐵塔附近拍攝時，有法國人主動上前幫忙拍照，幾秒鐘間攝影師身旁相機成部唔見，由於素材全無備份，萬千惠崩潰喊話：「只要把記憶卡還我，我送你兩台機器都可以！」萬千惠拍片還原事情經過，透露攝影師為拍攝短影音，暫時將相機放旁邊長椅，此時一名法國人上前要求幫忙拍照，藉此分散眾人注意力，短短幾秒空檔間，長椅上相機已被搶走，佢對此非常震驚與無助，更直呼自己於中國生活33年，從未發生過呢種事情。
到前日（30日）萬千惠再次發文，稱要同巴黎嘅小偷勢力鬥爭到底，並去到丟失相機嘅地方舉起遺失物品信息嘅牌，希望更多人見到，又表示願意花2,000美元（約15,692港元）買回內存卡。萬千惠表示淨係遺失嘅記憶卡就價值1萬多人民幣，現場沒有閉路電視報案都冇用，團隊又曾試圖於附近草地搵，但最終無果，萬千惠無奈表示，為畀品牌方交代，團隊只能緊急借用一台長焦小相機，連夜補拍照片，同時聯絡大使館睇吓能否給予協助。中國駐法國大使館表示已收到求救。
另外，倪晨曦亦同樣「傷亡慘重」，佢留言：「到巴黎第一天就發生意外 心情一整天都在大起大落🥹不過好彩最後都happy ending」又上載Vlog講出經歷。原來佢一落機就已經有一件行李失蹤，好在航空公司都搵到，不過就需要幾日時間將之寄到去倪晨曦手上；同時，倪晨曦另一件行李篋則被掟爆，惟要親自去到當地總店先可以換取新篋，搞到佢要百忙之中抽時間去換篋，同日其遺失嘅行李亦到埗，雖然失而復得，但就輸晒時間。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
