藝人江嘉敏與呂慧儀將首次演出舞台劇，此劇改編自90年代電影《等愛的女人》，將片中搞笑及鬧交的經典場口再次搬上舞台。而她們今次最大挑戰是以全普通話演出，難度翻倍，異口同聲表示正苦練普通話，江嘉敏坦言對舞台劇零經驗，笑言已預料會有蝦碌場面，而呂慧儀面對新嘗試則信心十足。
前無綫小花江嘉敏與呂慧儀將首度踏台板，於本月31日在深圳演出舞台劇《等愛的女人》，該劇改編自1994年由葉童、吳家麗、馮寶寶及王小鳳等主演的同名電影，並由當年導演原班底打造。故事講述4位都市女性不同的愛情觀，江嘉敏與呂慧儀分別「重演」戲中吳家麗與馮寶寶的角色。日前她們拍攝造型照，其中江嘉敏以白色低胸晚裝上陣，大晒湯碗胸，相當吸睛。而電影中有一場因吳家麗醉酒而引發閨密互數鬥罵的場面，故幾位女主角隨時要在舞台劇版本開戰。
零經驗 預咗有蝦碌
江嘉敏接受本報獨家訪問時，表示心情緊張又期待：「呢次係我人生首個舞台劇，更加係第一次用普通話演繹，對我嚟講係好大挑戰。依家重點苦練普通話，台詞都寫晒拼音，避免讀錯音變咗第二個意思鬧出笑話，下星期就會正式展開排練。」問到其普通話程度，她坦言：「之前去咗上海拍短劇，用咗一半廣東話一半普通話，本身佢哋諗住用後期配音，但聽完我現場講普通話之後覺得我自己講番都冇問題，不過已經搵緊老師上堂練習。」雖然江嘉敏曾演出音樂劇，但始終跟舞台劇的表演及呈現方式不同，她謂：「舞台劇冇得NG，所以企位、對白嘅精準度要好高，因為我零經驗，真係幾緊張，希望到時臨場發揮好啲，我都幾肯定到時會有啲蝦碌嘅嘢發生。上次做音樂劇之前我有去睇幾次，劇本會熟啲，而且劇中啲演員本身有啲係認識，所以壓力冇咁大，但今次嘅舞台劇班底我係完全未合作過，所以要啲時間Pick up感覺出嚟，希望會接到啲新嘅火花。」問到跟對手有否親熱戲？她坦言看劇本就未有，不知綵排時導演與監製會如何指導他們的肢體語言。
演出一舉兩得
至於呂慧儀受訪時透露今次演出別具意義，因為舞台劇收益扣除成本後，將捐給慈善機構，既可行善又可作新嘗試。談到首次參與舞台劇，她說：「初時我都好緊張，後來見到侯導演（侯永財）佢好好，同我詳細講解咗我個角色，相信今次應該會合作得幾開心，我哋暫時各自睇熟啲劇本先，之後就會同其他演員一齊排練，第一次做舞台劇我覺得好大挑戰性。」問到會否大感壓力時，她指拍攝處境劇《愛．回家之開心速遞》多年，有充足的學習及訓練，有信心可以應付：「好期待同大家排戲。（你嘅普通話得唔得？）本身講係冇問題嘅，但係演出又係另外一個層次，都係要再努力啲。」
更多新聞，請瀏覽東方日報網頁：
本文作轉載及備份之用 來源 source: http://hk.on.cc
|
鍾意就快D Share啦！
|
|
|
