影視寒冬，AI風潮來襲，令藝人搵食愈來愈艱難，原本憑拍內地短劇狂吸金的林正峰，因AI短劇崛起，瞬間變「失業大軍」，為了維持生計，不惜一日跑勻香港、廣州多地，演藝、文職工作兩兼顧，寫字樓兼職仲要「打孖上」，為生活拚到盡！而昔日「TVB小花」江嘉敏，近日亦自爆工作一腳踢，更要「跑數」交租，苦不堪言！
林正峰入行9年，2023年憑劇集《新聞女王》與高海寧組螢幕CP成功彈起，並轉戰內地打響知名度，由去年底開始，不足一年共拍了8、9部短劇，全部擔正男一，以每部短劇平均5位數酬勞計算，可算是大豐收！可惜，隨着AI短劇興起，真人短劇幾乎被完全取代，他亦由原本的「短劇王」慘變「失業大軍」，對於自己辛苦經營的新路向如此快便「玩完」，他直言：「唔單止自己，內地唔少演員都不能幸免被失業，大部分嘅真人劇都變咗AI劇，嚟緊仲有AI電影，做演員會好艱難，但我會用『逆來順受，逆境自強』8個字鼓勵自己。」他亦坐言起行，近日正努力創作短視頻另謀出路，直言睇好內地新興起的一集約兩、三分鐘的短視頻，希望能拍出富電影感的作品，再度開啟新路。
演藝事業仍需努力，現實生活就必需加把勁，才能維持生計，高峰期曾日打5份兼職的他，本身是註冊社工，早前原本只有一份社工兼職，但由於短劇全停，近日再找多一份新工作：「呢份新工每月只返6日，收入唔多，但啱晒我唔定時嘅演藝工作，份工需要外勤同做好多文書工作，都兼顧唔少嘢，不過我覺得再搵多份都可以，應該應付到。」
穿梭中港由朝做到晚
林正峰除努力創作短視頻外，亦積極拍片經營社交平台，題材亦十分廣泛，當中包括一日打工行程實錄，短短數分鐘的短片將他艱辛的生活呈現！由清晨7時起床開始，遊勻香港、深圳及廣州，做齊拍攝節目、傾劇本及試鏡，到夜晚7時更大汗疊細汗趕返香港寫字樓做社工文職工作，全程只以零食、麵包充飢，直至晚上10時半才回家吃即食麵，不少網民留言讚他是「時間達人」，亦有粉絲指給他的短片感動，指會更努力工作，亦由於他的短片受歡迎，令他獲得不少「一日店長」工作，林正峰直言這些工作比拍短劇收入更高。
談到拍拖話題，林正峰透露有意參加內地戀綜，希望找到合適另一半拍拖，對上一次拍拖已經是3年前，自爆不幸做了「第三者」的慘痛回憶：「同佢（圈外女友）一齊時，原來佢同另一個男仔有聯絡，佢哋冇一齊過但一直有聯絡，直至個男仔返嚟，女朋友先講，我係唔知個男仔存在，覺得女朋友瞞住我，唔想涉及喺人哋關係不如放手，嗰時我好鍾意女朋友，唔開心咗好耐。」
另外，跟林正峰一樣，正受到影視寒冬衝擊的江嘉敏，早前受訪亦直言備受經濟壓力，為工作不惜自薦，早年憑藉劇集《親親我好媽》純樸學生妹形象迅速走紅，之後獲得TVB力捧，接連在《果欄中的江湖大嫂》、《兄弟》等多部劇集擔任重要角色，不過自去年二月她宣布離巢TVB後，所有接Job工作、合約制訂及宣傳工作均由自己一力承擔，壓力亦變得十分之大。近年積極經營社交平台的她，日前開直播與網民互動，亦直言現時面對不小的經濟壓力，需要勤力工作賺錢交租。
直播中，原本心情大好的江嘉敏被多個網民留言攻擊她：「離開咗TVB之後個人好寸嘴」、「以為自己好紅咩，好快冇工開」。面對挑釁，她眼神凌厲望住鏡頭還擊：「你哋覺得我講真話就叫好寸嘴？我對有禮貌嘅人一向好客氣，但對住冇禮貌嘅人，我點解要笑住受氣？」之後她又剖白離巢後自力更生的真實經濟壓力：「好多人以為做藝人好風光，其實我同普通打工仔一模一樣！我每個月睜開眼就要面對好大嘅經濟壓力，我要賺錢交租、要養屋企人、要供樓養車！我唔努力接Job做嘢，邊個養我呀？」她強調只要是正當工作，無論拍劇、主持或商演都會全力去搏。
更多新聞，請瀏覽東方日報網頁：
本文作轉載及備份之用 來源 source: http://hk.on.cc
|
鍾意就快D Share啦！
|
|
|
