熱刺前鋒蘇蘭基(19號)頂入逼和1比1。(Getty Images)
周日(11日)凌晨英超，兩支「落難豪門」交鋒，曼聯主場出擊，領先1球兼踢多1人優勢之下，補時被熱刺前鋒蘇蘭基頂入逼和1比1，今季英超6戰只有6分，創下自1986年以來，同期最差聯賽開季成績，「魔迷」睇到眼光爆，大部分時間狂噓曼聯，恐怕領隊卡域克開始聞到魷魚香。
賽前5戰不勝排榜尾嘅熱刺，今仗反客為主，一開波就搶攻，創造多次具威脅射門，曼聯門將拿文斯傳波失誤，被對手截到打反擊，蘇蘭基冇人看管之下起腳，拿文斯撲出將功補過。
熱刺攻勢一浪接一浪，古度斯勁射僅斜出，蘇蘭基近門起腳高出，熱刺上半場有7次射門2次中目標，曼聯只有1次射門，引起「魔迷」不滿，頻頻發出噓。
曼聯處於劣勢之下，反而73分鐘先開紀錄，馬菲奧斯根夏左路傳中，麥比奧莫接應轉身射入，呢位喀麥隆國腳喺英超累積射入熱刺7球，成為對方大剋星。僅過5分鐘，熱刺中場賓坦古亞同曼聯左閘勞基梳爾發生衝突，勞基梳爾出手推跌對方，賓坦古亞起身後用頭頂向梳爾報復，被球證出示紅牌出場。
曼聯踢多1人，照計應該可以力保勝果，但「臨天光瀨尿」補時2分鐘，辛度東拿利左路傳中，蘇蘭基喺利辛度馬天尼斯力逼之下，仍然頂入成1比1。根據OPTA統計，曼聯近3次英超遇上對手有球員被逐，都贏唔到波，只有1和2負。曼聯今季聯賽6戰得1勝3和2負，至於熱刺6戰3和3負，仍未贏波，但拎到1分，總算擺脫榜尾位置。
賽後曼聯領隊卡域克承認對果賽感到失望：「我哋唔應該踢得咁艱辛，一早就可以奠定勝局，但細節出現問題，結果就完全相反，我唔滿意現時分數，但必須接受現實，盡快向正確方向發展，我明白球迷心情，戰局不似預期，佢哋有呢種反應(噓聲)好正常。」曼聯將於周三(14日)凌晨歐聯作客馬德里體育會，勢必面臨更大挑戰。
最強博彩盤路過關神器《串績王》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|
