人氣女神張曦雯（Kelly）最近憑無綫台慶劇《璀璨之城》人氣急升，近日她接受TVB專訪時，罕有大方談及對吳卓羲有好感，直率真誠。去年她與拍拖8年的男友分手，回復單身後不乏追求者，現時的Kelly學懂不要想太多，最重要忠於自己的感受，開心便可。張曦雯透露，佢同吳卓羲早前因合作拍劇經歷了長時間的相處與磨合，意外發現彼此私底下非常「啱傾」：「我哋用咗咁多個月拍咗一套劇，中間暫停過再開拍，我覺得我哋建立咗個好好嘅關係，同埋佢都係心地好好嘅人，我哋意外地都好啱傾，所以都有好感。」佢又毫不吝嗇對男方的欣賞，大方承認對吳卓羲有好感，更大讚對方是一個「心地好好的人」。
談到兩人的緋聞時，她笑言雖然父母向來尊重她、從不過問，但對感情事十分關注的婆婆卻對吳卓羲非常有印象。雖然父母從沒過問，惟她笑指婆婆很關注其感情事，更透露對方是TVB的粉絲，大爆兩婆孫的搞笑對話：「我講笑問佢鍾意邊個，我就溝佢番嚟。」Kelly直言婆婆對卓羲的評價不錯：「佢都好似幾鍾意佢，卓羲細細個做戲，婆婆就睇住佢大。」
作為藝人忙於工作，難免有時要犧牲愛情，她認為最重要找到一個平衡：「我覺得感情係需要維繫，但我努力咗咁多年先有依家嘅工作成果，我亦都唔會放棄，所以希望搵到個平衡。」身為「I人」的她喜歡宅在家，望另一半成為她的好朋友，大家無所不談，享受兩人獨處的時光。現時一切稱心如意，身邊有愛錫自己的家人和朋友，再加上一個「對的人」便更完美：「我覺得依家已經好好，如果真係再遇到適合嘅人，當然會更加開心。」做人做事跟隨自己的腳步，想做就做，不排除將來閃婚。
《強人》系列是她的轉捩點，其中《白色強人》更令其明白何謂演戲，並遇上兩位伯樂，一位是監製Marco（羅永賢）；另一位則是郭晉安：「安哥哥都算係一個師傅，佢都教咗我好多嘢，或者唔可以講教，而係喺佢身上觀察或者有時大家傾個劇本時，就會發現『哦！原來你係咁樣睇，原來係可以咁做。』」
Kelly自知演技需要磨練，因此2019年決定去洛杉磯進修演技，學習演戲的理論，令其獲益良多：「雖然只係上咗個幾月，但過程好密集，唔係上堂就係同同學綵排，同埋又遇到兩個好好嘅老師。我都係一個讀書人，有個老師講完就好快入腦明白，所以令我有好多啟發。依家我準備一個角色嘅時候，都係用緊老師教我嘅嘢去做。」Kelly努力蛻變，望擺脫「花瓶」標籤：「我喺《破毒強人》
剪短頭髮或者喺《企業強人》做癌症病人，我特登光頭唔戴帽，呢啲都係我用自己嘅方法，畀大家知道我唔係淨係想靠外表，而係我想拎啲實力出嚟去得到大家嘅認同。我想愈做愈好，希望大家睇到我嘅努力，擺咗心機落去一個角色入面。」
她直認外表的關係，難免會局限其戲路發展，渴望終有一日演到「貼地」的角色：「我一直都畀唔到一個好Local嘅感覺畀大家，就算依家我講對白或者講嘢都要諗，如果我用自己嘅方法講出嚟，可能會有啲英文，中間啲文法又會錯，所以希望我嘅廣東話會愈嚟愈好。」
談到家庭，Kelly直認年輕總有反叛的時候，頑皮愛玩：「我會去穿脷環、又同啲朋友喺條街瞓排隊入去聽Metal Concert ，但總之唔會做啲犯法嘢或者同啲男仔亂搞關係。」當時僅得16歲的她，瞞着父母偷偷穿脷環，更大膽找同校的師姐幫忙：「嗰時未夠秤去穿，我同老友就搵咗高我哋幾級嘅女仔幫我哋穿。因為佢喺穿環嘅舖頭做兼職，所以我哋就畀錢佢再帶啲工具返學校，我哋仲要偷偷地匿喺儲物室度穿，我穿脷環，我朋友就穿臍環。」不過最終她穿了一星期就被母親發現，大罵一場：「當時被媽咪發現係好驚，我記得佢冇同Daddy講，佢話：『我唔同你Daddy講，你同我即刻拎番出嚟』！」即使被母親責罵，她坦言：「至少畀我試過。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
