由張智霖、吳卓羲主演的無綫台慶劇《璀璨之城》前晚大結局，收視及討論度齊被推上沸點。不少觀眾意猶未盡，網上連夜關注「不解謎團」之餘，更力推張智霖登上本屆視帝寶座。對於開拍續集，張智霖昨日受訪暗示個人未必再下一城，因為「已極致、難再突破」。
【記者溫國佳、吳文聰澳門直擊】男神張智霖（Chilam）與吳卓羲、女神張曦雯、高海寧、陳曉華及陳瀅等前晚於澳門出席《璀》劇大結局播放活動，吸引海量粉絲到場支持。今次Chilam扮演大奸角「官孝賢」，演技博得不少觀眾認同，大結局前夕上演一幕兩分半鐘的「淚之獨白」，於亡母靈前訴心聲，由自豪、脆弱到默默落淚，演活角色的無奈與悲哀，大結局則上演「自灌毒牛奶」，最終吐血身亡，畫面震撼！活動上，高海寧睇到哽咽表示：「感受到官孝賢努力向上爬嘅孤獨，要犧牲好多事。」令Chilam聞言流下男兒淚。
對於網民洗版式支持，Chilam感動非常，他昨日接受本報獨家訪問時笑說：「淨係講嗰兩分半鐘演出，咁就真係慘喇，我集集都好用心去演，盡晒力㗎！尋晚（前晚）完騷後我都諗番起，呢個Project首次同我接觸係2024年10月，即係話前後經歷咗咁耐，一個好嘅作品真係唔可以倉卒成事，一切談何容易呢？」猶記得當初《璀》劇開拍之初，他曾同時要兼顧內地綜藝節目《披荊斬棘》錄製：「好彩後嚟劇集停工修改，我可以先完成《披》節目再歸隊，原來老天自有安排，如果唔係，真係要咗我條老命喇！」無綫高層曾勵珍前晚開綠燈欲籌拍《璀2》，他卻暗示自己未必再下一城：「咁慘同咁壞嘅角色，對我嚟講已經演極致，如果再演戲嘅話，想試唔一樣嘅角色，因為冇可能再突破到喇！（今次算係代表作？）代唔代表作交畀觀眾評論。」前晚Chilam對於外界認定他是本屆視帝之選，他笑謂：「希望大家認同我演員嘅身份。我好似都做過幾次（頒獎禮）嘉賓，咁我……算唔算升呢？（係時候上台攞？）冇諗，到咗依家呢個年齡，都係有能力嘅時候盡量演好角色，觀眾睇得開心係我最大嘅收成。」至於會否出席頒獎禮，則要視乎會否跟演唱會撞期，他說：「全劇都花咗好多心機去突破自己，所以我祝福《璀璨之城》會係最佳劇集。」今次演奸角成功，他自爆下一步想挑戰當導演，並回應早前指張曦雯「唔輸得」才演出半裸戲，純屬戲言。
高海寧為張曦雯「裸」得少解畫
高海寧則指劇集收視好，要感激觀眾。提到台慶頒獎禮，她信心十足：「我諗呢套劇會好多提名，因為每個人都有Talking point。」張曦雯的半裸戲由原先的7分半鐘被刪剪只剩2秒，問到會否戥對方可惜，高海寧解釋：「其實只係剪開咗兩段，即係同一場戲，擺咗喺上集尾同下集頭播，成場戲差唔多有4、5分鐘。（性感戲剪剩2秒。）不嬲都係咁短，真嘅！」她又明言如開續集要睇劇本再決定，不想為拍而拍。至於吳卓羲與張曦雯「CP檔」受訪，談到裸露戲被刪減，張曦雯表示：「我覺得做演員最緊要場戲表達到個情緒，表達唔到先會可惜。」她又補充若劇組決定播足本版，自己亦不介意。當提到婆婆對吳卓羲印象不錯，她更向婆婆表示過「你鍾意邊個，我就溝佢返嚟」，張曦雯紅着面說：「唔使我溝啦，好熱呀依家！（對方出咗手，所以唔使溝？）問阿婆點答先。」記者繼續追問，她才按捺不住笑答：「出咗（手）喇，滿意未呀？」而吳卓羲表示期待下次能再跟Chilam合作。
另外，不少劇迷睇完大結局，即開始於網上討論《璀》劇7大不解之謎，包括Chilam當年是否誤殺生母、吳卓羲為何突然原諒Chilam、江美儀是真傻定扮瘋？種種懸念令劇集餘溫未了，對無綫開拍《璀2》之說，自然舉腳贊成。
更多新聞，請瀏覽東方日報網頁：
本文作轉載及備份之用 來源 source: http://hk.on.cc
|
鍾意就快D Share啦！
|
|
|
