曼聯成績低落，管理層好大責任。(Getty Images)
曼聯近年成績沉淪，不斷更換領隊都冇轉變，歸根究底就係管理層目光奇差，轉會市場十買九錯，而呢個主流意見近日獲官方認證！國際體育研究中心(CIES)最新報告，指曼聯過去5年買入球員，身價貶值逾4億歐元，係全歐洲蝕得最「甘」球隊。
國際足協有份創立嘅CIES近日發表報告，統計全球幾百間球會自2021年開始，5年來轉會操作收益，包括球員買入價、賣出價同目前身價評估等等，結果顯示曼聯嘅球員買賣狂蝕4.05億歐元，喺英超遠遠拋離「第2蝕」嘅熱刺(1.88億歐元)，亦係整個歐洲之冠；縱觀全球，只有沙特嘅希拉爾蝕得更甘(5.02億歐元)。
呢個結果絕對唔令球迷意外，曼聯喺2022年用1億歐元簽安東尼馬菲奧斯，上年賣去貝迪斯只收番4份1轉會費；查頓辛祖、卡斯米路、海倫、奧拿拿等球員，都係高價買入、低價/免費走人，即使依家仍然留隊嘅美臣蒙特、約舒亞舒克斯等都身價大貶值。
英超球會當中，只有曼聯、熱刺、高雲地利同葉士域治係蝕錢，曼城就以「賺」4.47億歐元成為最精明消費球隊。睇番成個歐洲，德甲法蘭克福賺5.27億歐元成為No.1，皇家馬德里賺4.99億歐元排名第2位，當中最大原因係免費簽入基利安麥巴比。
曼聯今季一沉百踩，近期口多多嘅前領隊坦哈格，被問到曼聯今季有冇可能降班，呢位荷蘭領隊表示：「喺英超絕對有可能！因為英超每一隊都好強，每隊都有好強大嘅陣容、出色嘅領隊，只要行錯一步，就會陷入惡性循環，面對好大問題。」
足球博彩神器，每日重心提供盡在《彩報》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|
