普捷天奴已同曼聯達成口頭協議。
曼聯新帥扑槌！多間權威媒體證實，曼聯已經同美國隊主帥普捷天奴達成協議，並正式啟動佢合約內700萬鎊解約條款，上任之路暢通無阻。54歲嘅普捷天奴將成為曼聯今年內第4個領隊，佢最著名嘅地獄式訓練，就被視為打救「紅魔鬼」嘅終極武器。
曼聯高層周四(12日)喺法國同老闆拉特克利夫拍板，聘請普捷天奴代替卡域克執教，計劃落實後分頭行事，「拉爵」同大股東格拉沙家族交代換帥安排，總監韋確斯就同普捷天奴接洽，轉會權威羅曼諾證實，雙方已就合作達成口頭協議，曼聯亦向美國足總提出要人，由於普捷天奴合約內有解約條款，美國足總無權阻攔。
阿根廷籍領隊普捷天奴，周三(11日)現身美國國家隊操練，期間被影到同到場嘅美國足總主席等多人擁抱，疑似係作出告別。不過美國將會喺中北美洲國家聯賽8強，同海地進行兩回合賽事，據報曼聯唔介意普捷天奴繼續帶埋呢2場，下周三(18日)先正式上任。
曾執教熱刺、車路士、巴黎聖日耳門等豪門，普捷天奴未上任已令曼迷興奮，事關呢位名帥一向非常着重體能，曼聯今季總跑動距離為699.7英里，喺全英超排名尾2，亦被視為成績低迷嘅重要原因，而普捷天奴就以地獄式訓練見稱，其中一個名為Gacon Test嘅訓練，更係職業球員噩夢。
普捷天奴呢個訓練要求球員進行45秒跑動 / 15秒休息嘅循環模式，每完成1次後就增加跑動距離，曾被普捷天奴教過嘅球員都叫苦連天，前熱刺球星基爾獲加表示：「踢過熱刺嘅人都知呢個訓練，我有生以來只係見過1個人完成測試，嗰個係迪利阿里。」
普捷天奴喺2014年接掌熱刺，當時熱刺跑動距離係英超包尾，但喺佢完整執教嘅第1季，熱刺就飛躍成全英超跑動之冠，曾喺熱刺跟隨普捷天奴多年嘅哈利卡尼表示：「如果你覺得疲倦，普捷天奴會要求你再跑多啲，跑到你唔會再咁易覺得疲倦！」
最強博彩盤路過關神器《串績王》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|
