普捷天奴能否以曼聯主帥身份出戰「雙紅會」實屬疑問。(Getty Images)
根據英國各大傳媒報道，曼聯領隊卡域克可能周四(12日)稍後時間離任，管理層已鎖定普捷天奴為新帥人選，但呢位54歲阿根廷名帥仍有教職在身，將率領美國國家隊出戰中北美洲國家聯賽8強兩回合賽事，即使佢答應成「魔」，亦未必趕及履新帶領曼聯踢下場英超作客利物浦，意味要由臨時領隊頂硬上，隨時又喺「雙紅會」失利。
據悉曼聯啟動換帥程序，行政總裁貝拉達同技術總監韋確斯周二(10日)飛去摩納哥，向班主拉特克利夫報告球隊情況及提出解僱卡域克，同時建議由普捷天奴接手執教。普捷天奴剛於今夏同美國足總續約4年，毀約金達700萬鎊(約7,330萬港元)，必須等拉特克利夫親自拍板。
英國傳媒指「拉爵」基本上同意換帥，預料周四(12日)就會公布卡域克下台消息，呢位45歲英格蘭少帥周二(10日)照常去到卡寧頓訓練基地為冇份入選國家隊嘅球員主持操練，佢早上7點15分已抵達基地，比平時早好多，工作7個鐘後離開，未知是否早啲返去收拾細軟。
雖然曼聯管理層已決定聘請普捷天奴領軍，但要同時間競賽，球隊下場英超將於11月23日凌晨作客宿敵利物浦，普捷天奴需要帶領美國踢中北美洲國家聯賽8強兩回合對海地，兩場比賽分別於11月15日及18日早上舉行，由於時間倉卒，「肥普」能否趕及以曼聯主帥身份出戰紅軍，實屬疑問。
此外，以曼聯頹勢即使由普捷天奴執教，亦難以擊敗利物浦，為免佢首場領軍就輸波，開壞個頭，會方一旦解僱卡域克，可能先安排1位臨時領隊迎戰紅軍，為普捷天奴「擋煞」，曼聯現時首席助教賀蘭特可能扮演「擋煞金魚」角色。
最強博彩盤路過關神器《串績王》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|
