掃呢頁CODE去手機

2013年5月30日 星期四

幫 Now打無綫 林峯造反




探熱針

幫 Now打無綫 林峯造反

無綫內憂外患,要嚴防王維基的 HKTV攞到免費電視台牌照的同時,又要為直線插水的收視做救亡,加上一手捧紅的小生花旦陸續跳船離巢,雪上加霜。

見得人的牌剩不了多少,卻連頭號親生仔林峯,都竟然掉轉槍頭,簽約接拍無綫另一競爭對手,同樣等住攞免費電視牌的 Now自家製大型古裝劇《大漢賢後衞子夫》。去年失落視帝的林峯,一直耿耿於懷,多次暗示滿約後不再續約,今次用蠱惑招接 Now劇,明剃無綫眼眉。

內部大震

林峯沉溺於同千語 BB的纏綿,亦未有荒廢事業。一心打算於電影圈創一番成績的他,孭飛的《男人如衣服》同《忠烈楊家將》都唔收得,連仆後他唯有專心接拍大陸劇賺人仔;正身在橫店為《陸小鳳與花滿樓》埋尾的林峯,六月中就緊接為新劇《大漢賢後衞夫子》開工。

這部《大》劇是無綫對家 Now首部自家製劇集,用以將來取得免費電視牌照後,作為頭炮省招牌,劇集總製片人是無綫前臣劉家豪、梅小青夫婦,兩公婆目前同屬 Now TV製作部總經理。

林峯接拍的新劇,在宣傳海報上有 Now大大個標誌。

梅小青同劉家豪的微博,都是用 Now TV製作部總經理,來介紹自己。

灰色地帶

對於林峯接拍 Now劇集,無綫內部大為震驚,不虞有人利用灰色地帶,偷雞接拍。

「呢個劇梅小青同劉家豪已經籌備咗成年,係佢哋响 Now嘅頭炮,搵男女主角都搵咗好耐,不過佢哋最熟嘅都係 TVB啲小生花旦,本來有傾過阿佘(詩曼),但佢冇期接唔到,跟住就搵咗電視版《山楂樹之戀》個女主角王珞丹。男主角佢哋想用番香港一線小生,但出名嘅全部都係 TVB人,於是佢哋諗到個劇除咗 Now有份,大陸嘅華策都係投資者之一,所以就用華策名義同 TVB簽約,變相好似接一般大陸劇咁,避過兩間香港電視台嘅衝突。」 Now工作人員說。

樂易玲原本諗住開高價推劇,點知林峯話要拍,樂小姐唯有諗計幫林峯搞掂。

拍《回到三國》時,發生潘霜霜床照事件,劉家豪經常陪住林峯,幫他擋駕。

《大漢賢後》女主角是大陸新進花旦王珞丹,早前她與 Super Junior成員崔始源拍了大陸劇《轉身說愛你》。

當年劉家豪幫林峯度身訂造《家好月圓》管家仔角色,令他事業更上一層樓。

林峯連續兩部電影《忠烈楊家將》及《男人如衣服》都仆直,唯有專心拍番劇集。

大細超

恃住有慣性收視,無綫橫行多年,大台條件苛刻,動不動對藝人玩封殺,只有後台大,才有機得皇恩大赦。

特權分子

關楚耀——

幫亞視拍過《親密損友》又幫王維基拍了兩部劇集,但因為他是譚詠麟契仔,阿倫同 TVB老闆陳國強相熟,所以沒有被封殺,更可頻頻在 TVB節目出現。

李克勤——

與陳國強友好,早前因為他是四大唱片一員不可在無綫亮相,但陳國強正式入主後,他即被解封,並以超高薪主持《決戰一分鐘》。

可有可無

張可頤——

去年宣布唔續約 TVB過檔 HKTV,隨即被無綫封殺,原本是《天梯》的女主角,宣傳期間公司將演配角的陳茵媺改為女主角,更不准張出席宣傳活動。

蒙嘉慧——

今年約滿 TVB,還未與其他電視台簽任何合約已被封殺,刻意不安排出席《仁心解碼 2》宣傳。

收半價

無綫有清楚條約指引,藝員只要不是用自己真聲演出,是可以接拍大陸劇集,但拍攝前都先了解清楚劇集的播映權是否有香港電視台購買,如果有,一般情況下都避得就避,以免尷尬,更何況目前處於電視大戰敏感時期,身為林峯經理人的樂易玲,最初都唔敢輕舉妄動。

「梅小青親自搵樂小姐傾,對方雖然冇一口拒絕,不過就開咗個天價,要收二千萬人仔先肯接,開得呢個價即係推啦!之後劉家豪再搵林峯傾,佢喺 TVB嗰陣好錫林峯,大家關係好好,結果林峯堅持要拍,樂小姐冇辦法推,要買佢怕諗辦法幫阿峯接得成,最後收一千萬人仔成交。」林峯身邊人說。

今次林峯堅持接 Now劇,除了報答劉家豪,更重要是對無綫心灰意冷,去年一心諗住可以做視帝,點知連豬肉獎都分唔到,被公司擺上枱玩,令他即時決定明年約滿無綫經理人合約後,唔再續約。既然如此,根本唔使俾面,剃無綫眼眉,林峯大條道理。

去年林峯是視帝大熱,結果乜嘢都冇,令到他開始對無綫有離心。

五月廿一日林峯同吳千語由美國返港,隨即飛回橫店拍劇。

五月廿二日無綫出動三百名藝員拍宣傳片,原本都有安排林峯多留香港一日出席活動,但遭林峯堅決拒絕。

之前吳卓羲拍過大陸劇《大丫鬢》,點知俾有線買咗,更頒了個有線視帝給他,令到無綫覺得尷尬,自此藝員部接劇時要更小心。

今年林峯大部分時間都留在橫店拍劇,目前他正為《陸小鳳》埋尾,拍得相當 hea。



鍾意就快D Share啦!