2013年5月22日 星期三

擋走 Tommy 阿嬌男友攬實 GDragon




G-Dragon上週四( 16日)晚到港,直至週日( 19日)晚離開。 GD留港 4日期間,所有「活動」都由 K先生安排,而 K先生亦好似保鑣咁貼身傍實 GD。星期日下午, GD出席完 Versace位於金鐘活動後,即跟 K先生登上座駕,到灣仔食韓國菜醫肚。

FBI

擋走 Tommy 阿嬌男友攬實 G-Dragon

韓國男天團 BIGBANG隊長 G-Dragon(權志龍),上週五( 17日)殺入亞洲博覽館舉行兩場演唱會。出名係潮男指標嘅 GD,喺演唱會中,唔只不斷玩變髮,更化身 DJ上升降台打碟,高潮位一定係佢唱出 BIGBANG大熱作〈 Fantastic baby〉,全場「 VIP」( BIGBANG對歌迷稱呼)齊齊跟住 GD大合唱,氣氛 high到爆曬燈。

3月於英皇春茗晚宴上,阿嬌(鍾欣桐)帶同男友 K先生上台祝酒,阿嬌有個猛料男友,當然飲得杯落。而阿嬌就因為唔喺香港,所以冇陪男友「湊」 GD。

連開 2晚個人騷, 24歲 GD當然唔會咁易謝皮,完騷後仲孖住同姓好友,阿嬌男友 K先生(權寧一)去 dragon-i繼續玩。 FBI收到風,今次 GD來港期間, K先生全程做 GD嘅娛樂大使,無論吃喝玩樂甚至夜蒲安排,都由佢包辦。連日來,除工作以外, K先生一趁 GD有私人時間,必定貼身傍實,外人想埋身一定唔使旨意。

好似曾 3黐 GD影合照嘅樂壇曱甴 Tommy(阮民安)就不斷搵機會埋 GD身,但當然無功而還啦! FBI之後索到料,原來 GD今次來港期間,其實都冇話特別叫班保安及保鑣禁止 Tommy埋身。事關一班韓籍工作人員根本唔知 Tommy係乜水,驚佢都廢事。而 FBI亦打過畀 Tommy,佢手機竟忽然停止服務,助手解釋佢轉咗台唔記得換新 sim咭喎!唉!

GD點都對我有印象!(真實對白)

曾 3黐 GD影合照嘅 Tommy,今次亦趁偶像來港,現身演唱會頭場,被問到 GD公開話唔識佢時, Tommy依然死撐:「 GD唔識我,點都對我有印象,我唔會失望,以後有合作機會。」真係踩唔死佢喎!

全程 mark實

週日( 19日)下午, GD出席 Versace店開幕禮, GD在店內「巡鋪」, K先生亦「 mark」到實,陌生人當然插針唔入。

帶落 PLAY玩

3月尾,少女時代來港, K先生曾帶過孝淵同 Sunny去中環「 PLAY」夜蒲;上週五( 17日)晚 GD開完首場港騷, K先生亦做埋導遊,半夜帶 G-Dragon落「 PLAY」玩,二人冇留喺 VIP房,反而出咗去舞池飲酒傾偈。

週六尾場演唱會完騷, K先生又做導遊帶 GD去蒲,不過今次係去 dragon-i。當車駛到 d-i門口, K先生同 GD因為見到大批傳媒而一度唔肯落車。

曱甴撲入 d-i

GD同 K先生入咗 d-i冇耐,曱甴 Tommy竟然又出現,但佢否認收到風嚟死跟 GD, Tommy話:「我嚟搵 Mark Ryan(欣宜前男友)咋!」

自己食辣蟹

一場嚟到香港,梗係要食番啲香港地道美食,週日( 19日)晚,臨上機前, GD由保鑣陪同下,踩入銅鑼灣鵝頸橋側邊嘅橋底辣蟹。 4日 3夜唯一一個節目唔見 K先生。

難得 GD來港開騷,大把香港星爭住潮拜。上週六( 18日),吳雨霏 Kary就孖住男友餘文樂捧場,入場後 Kary更一路搭住男友膊頭, sweet到暈。

GD一向 cool cool哋,你睇佢喺 Versace活動同祖兒影合照個 cool樣就知,但企喺 Janice Man隔籬就扮個怕醜樣,搞笑。

玻璃車開波

一連開兩場港騷嘅 GD非常準時, 8點一開騷就着住紅色戰衣坐上玻璃戰車登場,撐住枴杖獻唱〈瘋了 Go〉,全場「 VIP」即舉起 BIGBANG招牌皇冠燈瘋狂尖叫。

再玩雙輪車

上次 BIGBANG演唱會 5個成員喺台上大玩 Segway雙輪電單車,今次 GD開個人騷,一樣 encore揸住架 Segway繞台玩。 GD仲剝咗外套露埋入面件 Givenchy T恤,型爆!

爆炸頭自摸

換咗件背心再戴上爆炸頭假髮嘅 GD,就喺台又跳又唱〈 Breathe〉,其間仲忍唔住自摸,「 VIP」嗌到癲!

窩釘台捽碟

康熙大學後現代音樂系畢業嘅 GD出名有才華,唔只識唱作,演唱會中,佢仲化身 DJ,喺窩釘打碟台上將作品〈 Today〉重新編曲,邊唱邊捽碟。

握手超混亂

演唱會尾聲, GD即興跳落台走近 fans堆,引到成班 fans爭住同佢握手,保安都差啲被推跌。



鍾意就快D Share啦!
Related Posts Plugin for WordPress, Blogger...