掃呢頁CODE去手機

2013年9月27日 星期五

陳豪買定過萬元 BB牀 陳茵媺返港待產




陳豪連日拍戲趕搵奶粉錢,趁住小休,戴頂帽就出街睇傢俬。落單俾錢時,佢再三問店員係咪可以準時到貨。梗係,老婆就嚟返,唔遲得㗎!

媽咪姐

陳豪買定過萬元 BB牀 陳茵媺返港待產

佗住 5個幾月豪種嘅陳茵媺( Amiee),將於一星期內返香港安胎待產。準爸爸陳豪為咗迎接新生命, 4月尾就用 3,368萬購入大埔比華利山 4,000呎獨立屋,收樓後「嗱嗱聲」裝修,今個月中已順利入夥喇!

其他影片

媽咪姐八到榮升爸爸嘅陳豪,對豪 B非常豪爽,買完海景大屋後,再聽朋友意見,用$12,800買丹麥皇室禦用嘅 Leander BB牀,反而自己同 Amiee張大牀都只係幫襯 IKEA。早前,佢就單拖去咗沙田間 IKEA掃貨,專攻大型嘅傢俬,睇大牀同衣櫃時,都拎把軟尺出嚟左度右度,一啲都唔求其。落單時,仲同個售貨員研究咗成粒鐘,唔少人見到佢都即刻拎曬電話出嚟影相。陳豪唔單止唔介意,仲好有禮貌同人笑。

周二( 24日),陳豪出席品牌活動,媽咪姐問佢係咪去 IKEA買傢俬為老婆返港待產做準備,佢笑曬咁答:「係呀,不過 BB牀唔喺 IKEA買啦。我新屋入夥嘛,所以好多嘢需要睇,但就唔係 BB牀,買咗好多其他嘢,新屋有排執,好多箱都仲拆緊。坦白講,我都幾多嘢!好彩有我哥哥、媽咪幫手。(係咪買 Leander BB牀?)唔話得俾你聽噃。(香港 book咗醫院未?)都唔話得俾你聽噃。(咁有咩可以話俾大家聽呀?)佢好快返,清晨 5點機,到時會話俾你哋知。」

好啦,見你咁廿四孝,就等你同茵媺嘅好消息嘞!

上兩個星期,啱啱同大家分享咗天後陳慧琳 IKEA掃貨事件簿,呢日媽咪姐見到陳豪喺沙田 IKEA出現,已經唔再驚訝嘞。見佢睇衣櫃非常認真,猛問店員啲間隔可以點改。最終撲槌,買咗呢個趟門大衣櫃,盛惠$6,155。對陳豪嚟講,抵到爛啦!

$6,155

除咗衣櫃,陳豪仲去睇大牀、碌架牀等,為主人房、工人房諗定布置。大學讀設計嘅佢,鍾情簡約設計,呢款油壓牀最得佢心,盛惠$4,390啫!

$4,390

陳豪近期密密做,呢日出品牌活動,又收到親子手鐲做禮物,難怪佢回應時笑到見牙唔見眼,「我已經期待好耐, Amiee返嚟同 BB出世,今年太多開心事!」

跟埋陳豪出活動嘅豪媽,一樣笑到四萬咁口,猛同職員講未來孫仔,又話要送金器。

陳茵媺他條養胎

當陳豪喺香港日拍夜拍新片《點對點》,又狂接品牌活動賺錢時,陳茵媺就喺加拿大悠閒度日,好彩佢仲記得 post相上微博,等大家感受吓乜嘢叫幸福啫。

Amiee最 friend嘅,係讀書時嘅同學仔。趁住喺老家多倫多安胎,不時約同學仔食飯睇藝術展覽,順便胎教。

陳茵媺中秋有喜,不過唔係生得,而係屋企有小狗出世, so cute㗎。

郊遊吸新鮮空氣,係孕婦最佳活動! Amiee梗有做。睇吓個肚仔,凸起曬嘞。

老婆安胎,老公搏殺!陳豪大熱天時着冷衫戴頸巾拍《點對點》,都咪話唔辛苦。《蘋果日報》圖片

丹麥皇室獲獎 BB牀

陳豪寧願辛苦搵錢慳自己,都唔會慳個 B。經過多番諮詢後,據知佢揀咗丹麥皇室都用,香港區由天後 Kelly做代言嘅丹麥設計品牌 Leander出嘅橢圓形 BB牀!呢張牀最特別係備有 4件家具,可以隨住小朋友成長而組合成唔同嘅大細,攞曬獎㗎,又潮又實用呀!

$12,800

其他影片


鍾意就快D Share啦!