2013年9月27日 星期五

上屆港姐喺邊度




媽咪姐

上屆港姐喺邊度

今屆港姐除咗是非多多,又真係十年難得一見嘅美貌與智慧並重,曝光率奇高!搞到大家都差啲唔記得曬上屆港姐㖭。唔緊要,媽咪姐提提你,佢哋仲喺度,仲有啲睇頭㗎!

朱千雪儀態呢?

原來做得港姐都有個共通點,就係電話迷。呢頭黃心穎喺西餐廳機不離手,轉頭媽咪姐就喺隔籬嘅中餐廳撞到同屆嘅朱千雪( Tracy)。佢一派悠然自得咁喺度玩電話食雪梨,仲擘到個口好鬼大。卸咗任真係唔同啲,昔日嘅儀態已經唔記得曬咯!

朱千雪低頭係咁食,媽咪姐望咗佢好耐都唔發覺,港姐嚟講,警覺性低囉。

上年朱千雪大熱倒灶,但佢呢一年做過主持,又做《 On Call 2》女主角,依家喺新片《大峽穀》扮女警,同張學友做對手戲㖭!贏曬。

黃心穎「事業」強

上屆港姐亞軍黃心穎,真係鬼咁貪靚。早幾日媽咪姐約咗人响 TVB西餐廳下午茶,一眼就望到近排主持緊常識節目《學是學非》嘅佢,鬼咩!條事業線夠養眼嘛。媽咪姐見佢一隻手拎咖啡飲,一邊用電話照鏡,都照咗好耐吓!其間又玩吓 WhatsApp,總之兩隻手唔得閒啦。

心理學家話過,鍾意照鏡嘅人,一係自信心爆棚,一係就嚴重缺乏自信…… Well,仲使問嘅,心穎「事業心」咁強,梗係爆嗰種啦!

黃心穎出席今屆港姐決賽時,曬 5吋事業線,豪呀!

張名雅買呀!

老實,相比今屆冠軍陳凱琳,上屆冠軍真係輸樣又輸身家;對比黃心穎同朱千雪,佢又最無嘢拍,係啱啱先被派去同莊思敏、楊秀惠齊齊主持《姊妹淘》。 No problem!依據女人開心買鞋,唔開心買鞋定律,呢排猛買鞋嘅張名雅,應該開心番曬嘞!

呢排張名雅成日被影到去買鞋,仲專攻高踭類,輸人唔輸陣!

《蘋果日報》圖片



鍾意就快D Share啦!