掃呢頁CODE去手機

2013年12月27日 星期五

[忽然1周 961] 四哥拍《小生》嬲爆: TVB孤寒係人都知 四哥,TVB,謝賢,MW,




四哥接受 now訪問時,笑住寸為 TVB打工要倒貼,仲話為 TVB打工冇著數。四哥跑慣江湖,即使鬧人,都言辭抵死搞笑!

滾熱辣

四哥拍《小生》嬲爆: TVB孤寒係人都知

四哥謝賢、胡楓及 Joe Junior早前拍的《三個小生去旅行》,大收旺場,更勇奪台慶的「最佳資訊節目」,唯獨上台領獎時冇咗四哥。其實自《小生》播映以來,四哥僅出席過慶功宴,目的只是與台前幕後再聚,其他宣傳及訪問他都拒絕。

唔講唔知,原來四哥拍《小生》時拍到一肚氣,自資服裝不特止,更要自掏荷包萬歲。四哥嬲爆唔去台慶頒獎禮,但上周四( 19日)卻接受敵台 now訪問,自爆唔稀罕出席台慶頒獎禮,更笑住寸無綫︰「係人都知 TVB孤寒,我要倒貼呀!」明剃無綫眼眉!修哥(胡楓)亦力證老友帶錢打工︰「佢(四哥)成日萬歲!」

其他影片

《三個小生去旅行》播映以來,四哥拒絕所有宣傳活動及訪問,就連台慶頒獎禮亦缺席。他接受 now觀星台王賢誌( Vinci)主持的《 Vinci's Code》訪問時,自爆 TVB曾力邀他出席台慶頒獎禮,不過卻遭他拒絕。四哥話:「人哋頒獎禮,我去都冇用。(有獎攞喎?)事前唔知,而且去嚟做乜,對我冇用,我依家唔需要呢啲(獎項)!」

雖然唔志在獎項,不過四哥對《小生》其實好緊張。由於《小生》是真人騷,向來注重行頭的四哥為免失禮,不但自行置裝,更日日要自己拎衫。雖然事隔 3月,四哥憶起時怒火仍燒,忍唔住笑笑口寸:「拍嗰十四日,我就帶咗十四套衫,出發前襯好曬,每日著一套之餘仲要拎多一套出去,驚要臨時換衫。(同其他主持相比,你執得最正?) TVB冇得講啦,係人都知佢(指 TVB)孤寒,我要倒貼呀!」

上周一( 16日)台慶頒獎禮《小生》獲獎,胡楓及 Joe Junior心情激動,但四哥就冇到,認真唔俾面。

四哥身穿的 Jean Paul外套本來是長袖,但為了更好睇,故意剪短變短袖,相當揼本。

呻日拍十幾個鐘

明知「盲佬貼符」(即「倒貼」),但四哥都答允拍《小生》,全因他從未去過西班牙及葡萄牙,又可以與老友胡楓敍舊。至於被指紆尊降貴,又要搬行李又要坐火車,四哥都話小問題,最攞命反而係日日拍十幾粒鐘,一開眼又要拍,「每日朝早八點開始拍,有五部攝影機對住我哋,拍到收工為止,好誇張。(似真人 show,冇私隱?)都係呀。」

相比六年前,四哥往墨西哥拍《向世界出發》時,拍五集有廿八日的拍攝期,《小生》的拍攝時間不及《向世界出發》一半,對年屆 77歲的四哥來說,難免吃力。

躁到爆粗

由於拍攝時間緊絀,四哥躁爆,忍唔住爆粗催 Joe Junior,片段在網上熱播。

寸 TVB夥食差

其實在《小生》節目中,四哥在外景時用膳,都寸過 TVB飯盒唔掂。但修哥即刻補鑊,問四哥係咪好耐冇食過 TVB飯盒,仲話依家已改善咗好多,寸四哥見識少。 82歲修哥反應勁快。

修哥補鑊

每次過千元萬歲

拍得辛苦,但四哥十分體諒幕後工作人員,為了慰勞大家,他更多次自掏荷包請食飯請飲紅酒。他說:「我成日餵佢哋(工作人員)食嘢,仲請佢哋飲酒。我知佢哋唔可以叫酒飲,會俾公司詐型,咁咪我請囉。次次都成百蚊歐羅(約千元港幣),總之拍 TVB冇好處啦!」

本刊致電胡楓及 Joe Junior,兩人亦力證四哥經常萬歲。修哥話:「係呀,佢成日萬歲,好多萬歲。(你有冇萬歲呀?)我就少啲!咦!你邊間㗎?我唔答得你喎!你明啦。」

至於 Joe Junior就話:「四哥成日都有萬歲。(你有冇呀?)我做細,唔話得事。不過我有帶乾糧,都有請佢哋食!(四哥話同你唔熟,但佢成日叫你唱歌喎!)拍之前都係見過兩、三次,依家拍完梗係熟啦。反而我同霆鋒就熟,因為拍過電影。」

now邀請四哥接受訪問時,也找來著名西餐廳 Catalunya招呼貴客。四哥出發前也致電王賢誌,問:「邊間餐廳?唔好食唔嚟㗎!」

今年初霆鋒請四哥去旅行,去完翻尋味,四哥依家都話最想與霆鋒及婷婷去旅行,老人家只係想一家團圓啫!

宣傳節目時,只有胡楓與 Joe Junior出席,獨欠四哥謝賢。兩人事後受訪,亦力證四哥成日萬歲。

《蘋果日報》圖片

藝人貼錢出鏡

眾所周知, TVB拍劇的酬勞一向唔多,而且不少藝人為求效果都會出動「私夥」,他們的置裝費往往是拍劇的酬勞數倍,絕對是「貼錢」拍劇。

黃子華私夥戰衣

除了一向愛改對白,擔任編劇的工作外,黃子華更指自己要花半年時間來度劇本,需要大量「腦」力。剛播畢的《 My盛 Lady》中,他更出動大量私夥戰衣。

圖片

吳啟華新車當道具

今年初拍《 On Call36小時 II》,除了出動私夥衫,吳啟華連剛落地的 60萬房車也用來拍劇用,可見他非常重視。

汪明荃百萬服裝

09年拍《女王辦公室》時,阿姐飾演時裝雜誌社的總編輯。雖然 TVB找來不少名牌贊助,但阿姐的私夥也不少,服裝間更要鎖起保管阿姐達百萬的服裝。

鄭裕玲自聘化妝師

00年播映的《男親女愛》,嘟嘟出動大量私夥名牌手袋,單是 Hermès、 LV手袋已有十多個。 01年她主持《一筆 OUT消》,嘟嘟花百萬買衫之餘,連化妝師也是自聘。

寸霆鋒送車唔送油

08年,四哥為 TVB拍《向世界出發》(圖),平均五日拍一集,但拍《小生》就 14日拍十集,差不多一日拍一集。

在《小生》中,修哥提過自己有幾多個兒孫都唔及霆鋒一個,四哥則回應話:「有苦自己知!」在《 Vinci's Code》訪問中,四哥繼續發揮寸爆精神,連兒子霆鋒都唔放過:「霆鋒係對我好,送咗架勞斯萊斯俾我,但我冇錢入油呢。架車要司機開門,人哋以為我謝老四喺度扮勁,其實我係唔夠力開門,要司機開,所以咪『有苦自己知』囉。」

其實個仔送唔送禮物是其次,四哥心願最想一家人去北歐旅行:「雖然人人都羨慕我,但都擔心自己,依家單身,又『嗰頭近』。依家個 family細(得番霆鋒、婷婷同謝賢三個),我都想去個 family trip。想去北歐,睇嚇大自然景色。早前霆鋒公司去旅行,我都有去,但我請霆鋒去旅行,佢就冇時間!」栢芝帶咗兩個細路移民新加坡,孫冇得見,四哥依家開到聲,霆鋒應該識做啦!

其他影片


鍾意就快D Share啦!