寶牒還神
2013年陳豪過得非常豐盛，結婚生仔都在今年發生。這次他去求神之餘，更即場買了寶牒還神。外表西化的他去拜神，始終有點格格不入。
打頭陣
搵高人改單字名 陳豪仔契觀音保平安
本月 4日陳茵媺為陳豪誕下重 6磅 11安士的豪仔 Aiden，全城恭賀。新任父母湊 B既興奮又忙亂：陳茵媺要狂穀人奶餵大食 B，陳豪亦要捱眼瞓，但依然笑住講：「好辛苦！但係好享受！」
據知為保阿仔一生安康，向來西化的陳豪夫婦竟然信埋風水命理。由於陳茵媺是順產， Aiden的出生時辰八字冇得揀，所以陳豪託阿媽搵高人幫 Aiden改名補其八字不足，而陳豪亦親身入廟幫阿仔契觀音保平安。
上周四（ 19日）下午約一時，陳豪到跑馬地譚公廟祈福，誠心上香化寶，又點了香塔，逗留半小時才離開。
學湊仔、信風水，陳豪爸 B也 upgrade喎！
月初陳茵媺為陳豪誕下囝囝 Aiden，初為人父的陳豪急不及待與大家分享湊仔經，狂讚 Aiden靚仔可愛識擺 chok樣，即使要半夜三更起身餵奶換片都好樂意，極度享受湊仔的樂趣。
Aiden個名要有火
除了生活習慣改變之外，陳豪與陳茵媺連思想都有所改變。據知二人自小在外國生活，思想早已洋化，但陳豪最近對風水命理有另一番體會，知情者說：「阿 Mo之前唔太信風水命理，今年初有師傅話佢犯太歲，都係陳豪媽幫佢去攝太歲。但自從生咗囝囝之後佢好想知 BB條命係點，想知佢將來，於是陳豪媽就安排風水師朋友同阿 Mo見面。個風水師傅係碩士畢業嘅後生仔，叫 Ray Cheng，佢哋一拍即合。阿 Mo仲問埋改名用咩字，師傅話 BB命格屬木，水重，係聰明仔，個名有火有土最好，仲俾咗三個名阿 Mo揀，包括陳煜翔、陳顯焙、陳煥嵐。不過阿 Mo好想用單字，最後師傅俾咗五個單字，樂、磊、愷、廷、顯，叫佢五選一。」
入廟做足全套
陳豪忽然對風水命理產生興趣，一切都因做爸爸而起。他希望一家三口平平安安，兒子 Aiden將來健康成長，即使兒子未滿月，陳豪已急不及待去祈福。
上周四（ 19日）下午約 1時，陳豪駕駛平時極少使用的白色私家車，頭戴冷帽，單拖到跑馬地譚公廟。現場所見，他先在廟內多處地方裝香，之後廟祝安排陳豪做簡單的化寶儀式，廟祝在旁為他不停唸經祈福，其間隱約聽到陳豪及陳茵媺的名字。陳豪不時合上雙眼，非常誠心。未幾陳豪發現記者，禮貌地用口形向記者說：「拜神，唔好影相呀！」記者惟有暫時迴避一會，其後陳豪到火爐化寶，他整個頭都挨近化寶爐，非常牙煙，可見他非常新手。陳豪完成儀式後更與廟祝聊天五分鐘才離開。記者即場問陳豪是否幫囝囝祈福？陳豪笑曬回應：「今次還太歲！」記者又問他何時為兒子擺滿月酒？陳豪依然笑住說：「遲啲啦！會嘅！」說罷便急急腳上車，返回大埔比華利山寓所。
買香塔供奉
本刊記者事後到跑馬地譚公廟與當日教陳豪拜神的廟祝閒聊，得知陳豪原來近月才是譚公廟常客，最近更豪擲萬元，為初生兒子 Aiden及老婆陳茵媺買香塔供奉菩薩一年。廟祝指每個香塔可燃點半個月，每逢初一十五換上新的，一般人買香塔供奉，都會在香塔內吊著的紅卡上寫上祈福者名字及祈福字句，但陳豪愛低調，向廟祝表示供奉菩薩在心中，不用寫上名字，所以陳氏一家的香塔並沒有紅卡。
除了祈福外，出世只兩星期的 Aiden原來已與觀音上契，知情者續說：「阿 Ray（風水師）算過 Aiden個命格，契觀音會有助健康，又可保家宅平安，阿 Mo寧可信其有，所以就聽阿 Ray講幫囝囝同觀音上契！早一個禮拜，阿 Mo帶埋 Aiden去筲箕灣間譚公廟同觀音上契。嗰日天氣涼涼哋， Aimee要留喺屋企坐月。阿 Mo驚 Aiden冷親包到成隻糉一樣，為咗避開傳媒耳目，佢朝早八點未夠就出門口。阿 Mo大佬幫手準備上契儀式用嘅乳豬同水果，由阿 Mo代表上香，儀式一啲都唔馬虎。」
萬千寵愛的 Aiden，除了有觀音保佑外，亦不乏一眾長輩愛錫。上周五（ 20日）下午約一時，陳豪哥哥駕車送豪媽到比華利山寓所，幫手照顧乖孫 Aiden及新抱陳茵媺。據知本身擁有 40年診症經驗，是資深中醫的陳豪媽每日都親自調製廿八方（產婦坐月連續 28天服用藥方）給陳茵媺補身。她還堅持每日朝早去街市買木瓜及魚等，煲木瓜魚湯及鮮奶魚湯。據知陳茵媺向親友表示想餵人奶餵足九個月，現在有陳豪媽的愛心湯水，應該事半功倍。而近日陳茵媺雙親亦從加拿大多倫多來港，探孫之餘亦與陳豪媽輪更照顧兩母子。周日（ 22日）冬至，陳茵媺父親更駕車送親友離開比華利山。
堅持餵母乳
據陳茵媺身邊人透露，現時她餵人奶好辛苦，每兩小時便要餵一次，即使有預先準備好的母乳儲備， Aiden每逢三更半夜喊，陳茵媺都忍不住起牀，堅持親手餵哺。加上近日天氣乾燥， Aiden皮膚出現輕微紅疹，陳茵媺每日都好有心機幫兒子搽潤膚膏，認真勞心勞力。
留無綫有轉機
陳茵媺停工湊仔，陳豪自然要努力搵奶粉錢。一直傳陳豪與經理人嘉莉約滿後會自組公司接 job，不過近日有消息指，無綫打算將樂易玲調到上海分公司 TVBC，原本的經理位由陳豪經理人嘉莉頂上。即將滿約的陳豪，隨時繼續效力無綫，到時可多點時間陪妻兒。今次陳豪去求神，唔知有冇求埋事業順境呢？
譚公廟求家宅
愛子心切的陳豪，為囝囝 Aiden祈福的譚公廟位於跑馬地，內裏不但供奉譚公、北帝和同祀神靈，還有觀音、女媧、呂祖、慧能及五方財神。譚公昔日被視為海上安全之神，早年不少漁民都去祈福，時至今日主要是求家宅平安居多，香火十分鼎盛。現時除跑馬地外，還有筲箕灣、香港仔及東平洲有譚公廟供善信參拜。
契觀音健康好
原來小 Aiden腳頭唔錯，不但和媽媽感情要好，更會帶旺爸爸陳豪。玄學家麥玲玲表示：「 Aiden命格屬木，會好黐媽咪，但就旺爸爸多啲。 BB係個思想型強嘅人，不過好快就要離鄉別井，可能係去第二度讀書。外形同爸爸一樣會係高大同靚仔。（ BB同觀音上契後會點？） BB上契觀音，可以令佢再健康啲， Aiden身體冇咩大問題，只要注意嚇啲皮膚就好好喇！」
娛二代單字派
近年好多人鍾意幫仔女改個單字中文名，圈中唔少父母都跟潮流，個名得兩個字，第時小朋友返學俾老師罰抄自己個名都容易啲啦！
雙陳父母輪更照顧
|
鍾意就快D Share啦！
|
|
|
