[忽然1周 961] 魔童強勢復活 蒙嘉慧捉蟲翻兜 TVB 魔童,TVB,蒙嘉慧,王維基,MW,

早前，王維基請港視員工 BBQ，蒙嘉慧都有出席，仲同王生猜包剪揼，贏咗人哋唔少錢。不過上周五（ 20日）王維基召港視員工返總部宣布進軍流動電視，就無 YoYo份。

媽咪姐

魔童強勢復活　蒙嘉慧捉蟲翻兜 TVB

上星期五（ 20日）王維基突然宣布以 1.42億收購中移動全資子公司 China Mobile Hong Kong Corporation Limited，提供流動電視服務。出年 7月開始，所有港視劇集包括網上熱爆嘅《警界線》都會相繼出籠。王生話之前裁咗嘅 320名員工，會陸續請番佢哋，而所有停拍嘅劇集都會復拍，未來兩年仲會增聘 800至 1,000人，再重金請電視小生花旦拍劇！「 Sam哥」吳鎮宇、「 Cool魔」張智霖同「教主」黃子華都話有興趣㖭。

其他影片

對廣大香港市民同各位 HKTV員工嚟講，真係天大好消息！不過對於蒙嘉慧嚟講，就真係笑唔出咯！事關得罪曬無綫一眾高層嘅蒙嘉慧（ YoYo），之前好高姿態咁過檔 HKTV（香港電視）簽部頭合約，頭炮《天網》拍住舊拍檔林文龍，可惜政府宣布唔發牌，劇集拍咗 7日就停工，但王維基好公道，出番曬糧俾佢。而媽咪姐就收到風，話「伊麵嫂」近日唔想坐以待斃，四出向娘家𢱑撈，不過佢自知得罪人多，所以搵人出面幫手。據知佢喺 TVB唯一 friend啲嘅監製羅永賢就同曾勵珍求過情，仲拍心口保證 YoYo回巢後態度一定好過以前，不過珍姐就未答覆。

蒙嘉慧拍過兩輯《法證先鋒》，表現愈來愈差，試過無端端話要放假，點知俾人發現係去咗拍拖，辣㷫監製導演同幕後人員。

黃子華：

我唔係商人，但作為創作人，我好鍾意佢（王維基）咁搏！之前港視搵過我，如果港視再搵，絕對會傾，都係睇嚇時間同各方面條件，最緊要大家多個渠道，大家都有得撈！

張智霖：

如果王生搵我，都有興趣㗎！都係睇劇本睇人腳，當然最緊要睇錢嘅啫。（驚唔驚 TVB嬲？） TVB咁大方，佢哋無咁小器嘅！

吳鎮宇：

支持佢（王維基）㗎！喺新媒體同公眾見面都幾過癮。電視機始終搬唔到出街，留守屋企嘅係大大小小（年齡層），中間嗰層係出街蒲，呢個係新選擇，幾好啊！

吳鎮宇同張智霖都俾 TVB老點入去撐台慶頒獎禮，點知 Cool魔攞咗豬肉獎， Sam哥就連獎都冇，知道子華攞視帝時，都忍唔住以誇張表情表達不滿。

視鄭伊健如細佬、同 TVB關係唔錯嘅林珊珊，亦有出口相助「弟婦」，不過直至依家，回巢計劃都未有眉目！嗯，據知《天網》會喺下星期復拍，睇嚟 YoYo分分鐘兩頭唔到岸，睇嚇有冇得翻兜又翻兜嘞。

上周五（ 20日）中午，王維基通知公司百幾名員工同管理層返港視葵湧總部開會，四點半港視喺港交所發公告，宣布全面進軍流動電視，在場支持嘅（左二起）駱應鈞、薑文傑同陳安瑩都感動到眼紅紅，同王生握手道賀。

美棋 BB喊住撐

知道港視有出路後，一班港視員工都心情興奮。上周六（ 21日）美棋 BB（黃美棋）出席新片《錯過》記招時，仲忍唔住喊：「開心唔止係我無嘢做嘅時候，有人搵我拍戲，仲因為收到好多恭喜說話。流動電視市場佔有率有 95%，觀眾絕對唔會少，所以我要好好努力。」

有片商好欣賞一班港視藝人嘅熱誠同堅持，特別搵佢哋拍慈善勵志電影《錯過》，證明有心做，點都有人欣賞。

（左起）「港版半澤直樹」陸駿光、郭峰、張松枝同艾威一直力爭發牌，如今港視落實開台，佢哋都非常振奮，走到港視將軍澳地盤前拍照。艾威仲話：「我覺得又重拾番獅子山下精神，證明到努力係唔會白費，起碼大家有番份工！」媽咪姐提提大家，仲要繼續爭取發免費電視牌㗎！加油！

《蘋果日報》圖片

其他影片

鍾意就快D Share啦！

下一篇 》