秋官同小販阿叔原本好好傾，但老婆一到，即刻掉頭跟住尾行。
同你吟一吟
秋官甘做老婆奴
就算怕老婆會發達嘅說法毫無根據，鄭少秋依然甘心為官晶華做咗四分一世紀老婆奴。話說早排《壹》仔見到秋官喺銅鑼灣街邊小販檔同個阿叔有傾有講，吹水吹咗近十分鐘，直到官晶華突然殺出，小秋子半秒都唔敢慢，急急腳跟住走，女前男後，行去希慎廣場樓上間何洪記食雲吞麵。
食飽走人，細心嘅小秋子又服侍老婆大人著羽絨、撥好頭髮，行去時代廣場期間，有熱情女粉絲認得秋官想繑實合照，點知秋官即刻縮開，只肯同對方排排企影相，梗係！老婆大人就喺兩米範圍內監視。
去到時代廣場樓下 city'super，官晶華自己行咗去掃貨，秋官一個人睇嚇薯仔、睇嚇咖啡機，又望住貨架上嘅開心果若有所思。 Hea完一輪，秋官校啱時間去搵番老婆報到後，再自己去停車場攞定架車接駕。一個願打、一個願捱，八珍冇嘢補充。
|
鍾意就快D Share啦！
|
|
|
