2014年4月10日 星期四

[壹週刊 1257] 老豆欠債 黃又南十年未還完 又南,M1,




探熱針

老豆欠債 黃又南十年未還完

組合 Shine的黃又南由 03年開始,為生意失敗的父親孭債七百萬,多年以來,每月還錢八萬; 09年又南為面子向外表示已將債項還清,據了解,他只是搞掂財務公司的一大筆,還有向親友商借的百多萬未清數。試過日踩夜踩在片場做到暈低,也曾跪地哭求因欠債而變賭鬼的老豆收手;還債十年,黃又南至今仍未甩到身。

月還兩萬

○七年 Shine拆夥後,黃又南投奔內地搵食,直至前年 Shine在黃偉文演唱會復合鹹魚翻生,有機會開出道以來首個演唱會,拍戲為主的又南更由大配角變為二線男,近日有份孭飛的電影《那夜淩晨,我坐上了旺角開往大埔的紅 van》更人氣爆燈,密做唔停手,不過因為父債,財來財去。

「又南呢幾年都一直還緊錢,而家孭住嗰筆係之前同親戚借落,比起早幾年跑財務嗰條數,已經冇頂得咁辛苦,而家每個月都係還萬幾兩萬,但除咗還錢,佢仲要負責屋租同爹哋媽咪生活費,一家幾口連埋家姐開支好大,又南好生性,自己架車揸咗九年都冇換過。」知情者說。

到朋友的車房吹水,慳慣的又南都買定樽裝水,邊傾邊飲。

因為要還債,依然揸住九年前的舊車開工。

二人在陳果執導的《紅 Van》有不少戲份,早前更隨團周圍飛出席影展。

電影《紅 Van》被高登仔力撐,更揚言要力谷票房促使開續集。

老豆爛賭

去年演唱會中,又南三度喊爆講述借貸的艱苦日子。據了解,除了一直為老豆還債外,有段日子,黃父因為爛賭,令債球愈滾愈大。

「經歷生意失敗後,佢老豆情緒好差仲染上賭癮,搞到又南經常要四圍問朋友撲水,又試過辛苦到捱唔住喺片場暈低,直到有次佢跪低喊住求老豆唔好再賭,情況先有改善。」

上週二(四月一日)早上,又南揸住他的陳年 Audi到灣仔做運動,之後再到銅鑼灣加路連山道的車房搵朋友。翌日下午,記者在又南離開寓所時上前問他有關仍欠親友過百萬未還一事,他避重就輕,只表示○九年已經還清債項。對過去十年經歷的起跌,他十分感觸。

「我之前以為 Shine已經死咗,兩年前知道我哋仲有巿場,所以特別落力去做。同女朋友拍拖咁耐,感情係好穩定,都有諗過結婚,但都要諗埋之後嘅生活。況且難得再有機會可以喺幕前演出,我梗係搏命爭取每個機會賺錢,我已經三十歲,要努力唔可以再玩。」

Shine在 12年復合撐黃偉文作品展演唱會,由於反應好,二人因而增加不少幕前演出機會。

又南為還債,這些年都密做當三番,當中包括他主演了無人知的內地電影《麻辣空姐》以及《四大名捕》。

捱到暈

11年底,又南在北京出席電影記者會,因疲勞過度在現場暈低,要工作人員孭他到休息室。

上曬身

因為家人家事,波及自己的圈中例子,舉目皆是,由過去張學友還兄債、蔡少芬償母債和李彩華孭父債,還有張栢芝、洪欣……總有一個喺左近!

張栢芝

老豆張仁勇欠債有前科, 99年已被黑道中人發江湖追殺令追債的張栢芝,一直父債女還,去年初,張仁勇又遭人在中環及灣仔一帶掛大型海報追債二百多萬。

洪欣

去年初,洪欣的「疊馬仔」老豆被人在跑馬地貼追數大字報,為避債主,洪欣一家隱居內地,口口聲聲幫唔到老豆的她,之後無論大小工作都接,心軟幫老豆還債。

戒酒戒蒲

難得可以復活, Shine成員之一的徐天佑亦放棄寫偵探小說做導演,回歸現實。

「以前會去蒲去飲酒,而家連酒都戒埋改飲咖啡。人大咗,會想身體健康啲,可以有足夠精神應付工作。而家有機會做幕前,我更加唔想嘥時間,會專心做好手頭上嘅嘢。」

計劃年底再開演唱會的 Shine,希望給觀眾一個全新面貌。「紅館好多限制,因為我哋好想做啲似 opera嘅音樂會,所以或者會改喺 APA(演藝學院)做,而家仲商量緊。」天佑說。

黃偉文作品展後,二人再有機會打正旗號以 Shine開騷,騷肌肉之餘,又南更在演唱會講代父還債一事。

人氣回升,二人近日開始出席品牌活動搵真銀。

徐天佑在電影《愛•尋•迷》有機會擔正,跟對手盛朗熙更有床戲。

黃又南被拍到跟圈外女朋友食飯,他大方承認對方是結婚對象。

無限復活

香港樂壇已死,冇人冇歌!反而造就一班老餅有機會復活繼續唱,定時定候蒲頭執一劑,組合代表,除了 Shine,還有草蜢和軟硬。

軟硬天師

林海峰跟葛民輝的軟硬於 88年開始,以搞笑形式主持電台節目大受歡迎,之後不斷以組合姿態搵食, 95年,二人傳出不和不再拍檔,直到 06年破冰再孖住拍廣告及舉行演唱會,至今仍定期拍檔搵食。

草蜢

蔡一智、蔡一傑以及蘇志威三子, 88年推出第一張唱片以勁歌熱舞打響名堂。二千年各自發展後成績不及組合受落。 05年再隨林珊珊加入 BMA唱片公司,憑《我們》再次人氣急升,之後不停巡迴演唱,半百熟男,仲跳得。



鍾意就快D Share啦!
Related Posts Plugin for WordPress, Blogger...