半百鄧浩光操肌 剝衫畀客睇
半百鄧浩光為顏福偉 激變肌男曬人魚線
現年53歲的前「飛魚王子」鄧浩光為顏福偉變肌男，狂操八嚿腹肌和人魚線，現於顏福偉公司擔任市場部經理的他，剝衫賣肉為公司的和興活絡油拍新廣告，半裸打拳似足《激戰》的張家輝，年過半百的鄧浩光憑毅力，成功操得肌肉回歸。
昨日鄧浩光接受本報電話訪問，公開keep fit秘方是跑步、遊水、健身和飲食配合，他說：「𠵱家53歲係半百老人，懶唔操會好醜樣，去年的起心肝操番，接受唔到中年身形，操咗幾個月瘦好多，由最肥180磅，五個月減30幾磅，呢啲真係意志堅持，自己運動員出身有規律，𠵱家幾有成績，以50幾歲嚟講算唔錯。」
對於身形弗爆，他謙虛說：「唔敢當，我只係keep fit希望身體好。」有否吸引男、女埋身？鄧浩光笑說：「點會，日日除衫行街咩，都冇人睇到，只係睇到我個樣瘦咗，自己都感覺後生咗，但突然瘦令皺紋多咗，要做好多mask補濕。」
■鄧浩光成功操出八嚿腹肌和人魚線，為老闆顏福偉變身肌男拍廣告。
除衫籌5,000元
老闆顏福偉坦言被鄧浩光弗爆肌肉吸引，令他想起《激戰》的張家輝：「佢之前湊女變肥佬，坐office車軚出曬嚟，減肥減得好辛苦，初時減好似馬騮，瘦得好乾，後來睇到佢八嚿腹肌諗起《激戰》，覺得唔好嘥，50幾歲好難得。」顏福偉還自爆今年春茗要鄧浩光剝衫：「我要佢剝衫畀客人睇，不過佢唔肯除，大家話佢除就捐錢，夾埋捐5,000蚊，結果佢先肯除，畀人知唔係假，唔係電腦做出嚟，係佢努力成果。」顏福偉還哈哈笑說：「我只有一塊，但唔會有大肚腩，我都想好似佢咁剝衫畀人睇，但冇咁嘅本錢。」
採訪：皓騫
■現年53歲的鄧浩光身形弗爆，五個月成功減掉30多磅。
■顏福偉睇到鄧浩光的肌肉，即諗起《激戰》的張家輝，所以廣告內鄧浩光都有打拳甫士。
|
鍾意就快D Share啦！
|
|
|
