2014年4月29日星期二

《竊聽3》劇情版預告踩地雷曾江：丁屋政策，係時候了斷！曾江,

《竊聽3》劇情版預告踩地雷曾江：丁屋政策，係時候了斷！

2014-04-29 21:49:00

Youtube截圖

電影《竊聽風雲3》日前推出聲波紋預告，講述土豪出招搶丁權，講劉青雲﹑方中信﹑林家棟及林嘉華四兄弟，點樣買賣丁權賺錢。上次聲波紋效果嘅預告片，展示戲中幕幕精彩場面。今日網上劇情版預告，終於終極曝光喇! (去片: http://bit.ly/1nBCQxj )

《竊聽3》中，劉青雲、方中信、林家棟、林嘉華飾演新界最大鄉紳集團陸氏家族嘅四兄弟，青雲飾演嘅陸金強係陸家老大，帶領其他三兄弟擴張陸國集團、意圖壟斷新界甚至整個香港嘅房地產業，並借助內地富豪資金、採取暴力手段收地蓋樓，但與此同時以曾江為代表嘅幾位「黑幫大佬」亦等緊呢嚿肥豬肉，伺機向青雲出手。

最新嘅劇情版預告中，曾江一開場已講：「同我反枱，你手上有幾籌碼呀？」﹑「所以丁屋政策，係時候了斷。」；至於林嘉華同方中信喺戲中都拋金句，林嘉華話：「何謂邪鬼何謂神，神鬼如何兩不分。」而方中信則說：「Everything's under control。」正式帶出《竊聽3》故事主線：非法買賣丁權及黑幫介入強收土地等等，曾江一句：「所以，丁屋政策係時候了斷！」正正帶出重點。扮演大陸富豪嘅演員講咗句：「十幾萬個丁權，能建十幾萬套豪宅，那我們這次做的，就是幾百億的大生意了。」講得非常之白。

而有份主演嘅古天樂，今日出席活動時表示，近日忙住宣傳《竊聽風雲3》同《香港仔》，0依家成日都要四圍飛，差唔多日日都喺唔同地方宣傳咁滯，所以連自己出席咩活動都未必知0架。

講起《竊聽3》題材同地產商有關，古仔就話：「部戲係講一個香港地產商嘅發跡史，幾個主角都係兒時玩大嘅，可能大家覺得係講新界丁權為主，其實只係講幾個兄弟之間嘅鬥爭。其實我哋拍之前都有考慮過（指題材敏感），不過0依家攞到批文上映，應該冇乜大問題。」