2014年5月2日 星期五

[忽然1周 979] 請假陪東京豪買 安仔等 Sammi養身生 B Sammi,許志安,安仔,許冠傑,Sam,鄭秀文,MW,




兩公婆一出接機大堂就分開了,有安仔陪 6日嘅 Sammi春風滿面,雖然唔多肯答問題,但全程 keep住甜笑。

媽咪姐

請假陪東京豪買 安仔等 Sammi養身生 B

安仔 Sammi兜轉多年,舊年終於守得雲開,喺峇里秘婚,感情一日千里,甜到漏。其實許生許太眼見身邊唔少朋友紛紛生 B,都搞到心鬱鬱想加入星爸媽行列。不過,事業心一向重嘅 Sammi啱啱先爭贏宿敵千嬅,攞到紅館跨年騷個期,所以兩公婆已經商量好,先養好身體,做埋個騷就開 turbo!











早前先俾媽咪姐見到佢一支公去公園玩狗嘅安仔,其實真係好錫 Sammi。自己拎曬啲手信同行李。數嚇兩大喼加兩大箱,確係豪買無停手!

好似近日安仔明明忙錄音趕住 7月出新碟,上個禮拜都專程請 6日假陪老婆去至愛嘅東京輕鬆嚇,等之前忙拍戲同金像獎嘅 Sammi食多啲開心啲。媽咪姐收到風,今次兩人喪買喪食浸溫泉坐商務住半島,全程由安仔埋單,真係體貼㗎啫!

周二晚( 29日),許生、許太甜蜜回歸,安仔好有風度,推住多箱行李、手信負責開路,而素顏戴口罩嘅 Sammi就捧住個 fans送嘅蛋糕殿後。過關前兩人仍然糖黐豆,但一出閘後又即刻上演一幕前後腳引開記者。媽咪姐問 Sammi係咪去東京散心,佢就話:「去旅行咋!」有傳佢哋今年因開騷又唔得閒補擺酒, Sammi聽到後乾笑咗 3聲:「得我哋有分數㗎喇!」

再問安仔係咪特登請假陪 Sammi鬆一鬆,佢竟然有默契到同老婆答同一答案:「去旅行咋喎!請假?(你唔係錄緊音咩?)係喎。請假囉!」跟住又急急上車會合太太,但就左擰右擰迴避鏡頭。唏,咪咁怕醜 Sweet係要攞出嚟曬㗎。

出閘分頭走

未出閘時,安仔推行李, Sammi緊緊跟住老公。兩個神通廣大嘅粉絲一左一右護住 Sammi,送上蛋糕。

信咗主嘅 Sammi的確跟隨聖經所言,以丈夫為先,佢跟 fans行行嚇,不忘回頭睇嚇安仔喺邊。

現身 Zara

咪以為潮流天後 Sammi淨係識得買貴嘢,著名牌,呢次遊東京,佢就去咗涉谷 Zara掃貨,仲撞到 fans, happy影合照,勁 nice!

嘩嘩嘩,唔知仲以為係「 X豐速遞」上緊貨?查實係一班忠心粉絲自發為 Sammi擺好行李上車,勁!

都話結咗婚嘅男人特別細心,安仔一上車,就即刻幫早早安頓好嘅 Sammi整埋車窗窗簾,好溫柔呀!

今年開波

關於養身生 B,安仔 Sammi早有共識,今年開始兩個人都盡量減少夜生活,一得閒就一齊去跑步練氣,再加上安仔出錢出力嘅「日本購物治療法」,相信等 Sammi忙完,好快有好消息!

兄弟爬頭

安仔 Sammi上年 11月喺峇里結束 22年愛情長跑,不過兩個貴人事忙,等極都未見佢哋擺酒宴親朋,話唔定生 B仲快啲!反而好兄弟蘇永康同吳國敬就忽然衝線,兩個都會同多年圈外女友喺今年尾結婚擺酒,恭喜曬!

密友爆料, 46歲嘅蘇康同拍拖 8年嘅 37歲女友馮翠珊( Anita)將會喺年底聖誕期間擺酒結婚。佢已經叫 Big Four成員許志安、梁漢文同張衞健留個期做兄弟團。《蘋果日報》圖片

曾唔覺意爆蘇康今年會結婚嘅吳國敬,之前同圈外女友 Elain情海翻波,好彩最尾和好如初,佢早前出活動都話今年結婚走唔甩。《蘋果日報》圖片



鍾意就快D Share啦!
Related Posts Plugin for WordPress, Blogger...