踩足十粒鐘
當日賭癮發作的達哥，相約三個雀友到酒樓打牌，一打便打足十粒鐘，午、晚兩餐都在酒樓醫肚。
滾熱辣
ICU出嚟冇耐 吳孟達打足 24圈
現年 62歲的吳孟達（達哥），四月中因心臟衰竭被送往浸會醫院，因情況惡化急送入，其間更一度傳出死訊，幸最終死裏逃生。大病初癒的達哥，留院一星期暴瘦 25磅。
執番條命仔的他，近日留港休養，老婆亦專程從馬來西亞來港照顧。可是，向來有鋪賭癮的他，不理醫生勸告，竟相約雀友到酒樓攻打四方城，坐足十粒鐘連打 24圈，認真搵命搏。
近年長駐內地搵人仔的吳孟達，上月中在河北石家莊拍劇感染風寒，返港後又要馬不停蹄宣傳新戲，終捱病入院，最後證實是細菌感染引致心臟衰竭，其間病情惡化要入住 ICU接受治療，幸好搶救成功。
急搵雀友開枱
出院趕完戲後的達哥一直在家中休養，對於有份演出的兩齣新戲《香港仔》和《竊聽風雲 3》，亦講明不會現身宣傳活動，以免太過操勞。據知，達哥在出院前，主診醫生千叮萬囑他要多休息，不可到人煙稠密的地方，更加不可以做刺激活動，以免心臟負荷過重。為使達哥乖乖養病，原本在馬來西亞定居的妻子，亦專程來港照顧老公。可是，醫生吩咐言猶在耳，上周五（ 4月 25日）本刊發現正在休養的達哥，步出觀塘麗港城寓所後，不停致電朋友約雀局，其間記者聽到他說：「唔去咁遠啦，你哋就我過嚟觀塘……打幾耐唔係問題」
情緒波動易致心肌梗塞
達哥因心臟衰竭被送入 ICU，與死神擦身而過。出院不久的他，即要長時間趕戲和開雀局，據心臟專科醫生表示，過度勞累和情緒波動容易引發心肌梗塞，導致心律不整和心臟停頓，絕對有機會死亡。而家庭科醫生關嘉美亦表示，本身有心臟疾病的人，絕對不宜長時間打牌。「打牌或多或少會牽動情緒，仲要打咁長時間，加上心臟本身有事，醫生梗係唔建議病人咁做」
達哥：打牌能醫百病
其後，達哥步行去到一間離寓所只需十分鐘路程的酒家，與三個朋友會合，嘆番一盅兩件。記者聽到達哥朋友問他：「喂！你老婆放唔放人㗎？咪打打嚇走人喎！」達哥即笑笑口說：「你同我定啦，攞咗 permit（准許）」四人在酒樓結帳後，徑自走到酒樓角落特別間出來的狹窄位置，坐定定準備開枱打牌。其間，記者見酒樓侍應熟絡地和達哥有傾有講，看來他應該是酒樓的熟客仔。當日達哥由下午一時打到晚上十時多仍未打完。據酒樓侍應透露，達哥一落場，通常會連打 24至 36圈才收手。興起上嚟，試過由朝早打到半夜連踩 20個鐘。
大病初癒的達哥，當日精神不錯，可是身形明顯消瘦，面頰亦帶凹陷。打牌途中，他人有三急步出麻雀房，記者上前訪問他，他亦自爆要定期覆診及準時服藥控制病情。
記：記者達：吳孟達
記：達哥，你瘦咗好多呀？
達（不忘搞笑）：瘦咗廿幾磅啦，係咪靚仔啊？條褲都鬆曬。
記：依家要 keep住食藥？
達：係啊，醫生話要控制病情。
記：醫生話過你要休息，你仲打麻雀，醫生俾咩？
達：醫生……佢梗係俾啦，話最緊要行下，唔好嬲就得㗎啦，笑笑口就得㗎你冇聽過咩？打牌能醫百病嘛！
現時 160磅
達哥因心臟衰竭而短短一星期暴瘦 25磅，當日（上月 25日）所見，達哥雙頰凹陷，招牌肚腩都細曬，猶幸精神尚算不俗。
出院即補戲
除了不聽醫生吩咐，長時間開雀局，據知達哥出院後，便急急趕返石家莊補戲，直至數日前才回港覆診。知情人透露：「你估達哥想咩，上面要趕戲，達哥又簽曬合約，唔返唔得㗎。呢行行頭窄，俾人傳甩場，下次就冇人搵你啦。達哥屋企成竇人要養，唔計佢依家個老婆同兩個仔女，佢仲要養埋之前兩個老婆同三個女，好大開支嘛！」
除了養三頭住家，樓債對達哥來說亦是另一重擔，事關他在馬來西亞和北京皆有物業未供斷，即使剛在鬼門關擦身而過，達哥仍拼老命返內地補戲。當一家之主不容易，三家之主更是百上加斤。
|
鍾意就快D Share啦！
|
|
|
