情侶 T
Anjaylia同白淨男著同款字母 T孖住行街，襯到絕。
探熱針
左右逢緣 少女版李若彤 背有米男友姣溝白淨男
無綫叫座力不復當年，令新劇《女人俱樂部》只能叫好不叫座，至於劇中飾演後生版李若彤的𡃁模陳嘉寶，人氣雖然未能靠公仔箱大幅度調高，但有富二代初戀男友黃頌祈照顧， Anjaylia不過賺錢買花戴。
身為基督徒， Anjaylia講到明同男友唔會有婚前性行為，但原來偷食，另計！
上週六（五月十七日） Anjaylia做完活動，相約手持 Chanel袋的青靚白淨男，著情侶 T行老銅，兩人沿途卿卿我我， Anjaylia更任由對方摸自己把秀髮，好甜蜜。
情侶 T遊街
上週六（十七日）， Anjaylia出席完品牌活動，孖住松岡李那以及好姊妹 Evelyn蔡穎恩，坐保母車離開。 Anjaylia在銅鑼灣鵝頸橋街市先行落車，再步行到時代廣場。其間有途人認出她，更手指指話：「拍 M Club嗰個女仔喎」、「乜後生版小詩真人咁細粒嘅！」被人評頭品足， Anjaylia刻意低頭篤手機避耳目。在時代廣場呆等五分鐘，一男一女友人終於現身，三人繼而轉往商場大堂，會合另一名手執 Chanel袋，跟 Anjaylia著住情侶 T的白淨男。
早前 Anjaylia承認同屋企有七千萬物業的闊少黃頌祈拍拖，早有另一半，但當日四人行去 ZARA睇衫， Anjaylia全程傍實白淨男，好癡纏。
睇完衫，轉場到樓上的 Pizza Express等位準備開餐。餐廳門外企滿排隊食客，白淨男刻意拉埋 Anjaylia企死角位咬耳仔，兩個仲愈企愈埋，後來白淨男乘機幫 Anjaylia撥頭髮，女方亦照單全收。晚飯食到十點，離開時友人發現有記者，白淨男馬上英雄救美，掩護 Anjaylia撇甩跟蹤。
身價五級跳
有富二代男友照顧，又有白淨男護花， Anjaylia唔只桃花旺，事業亦轉入直路。
雖然被宇宙膠劇《西遊記》拖累《女人俱樂部》收視成績，但勝在贏口碑，尤其劇中飾演少女版李若彤的 Anjaylia，做了六年「邦民女」，騷價多年維持在萬五元水平，全靠拍劇入屋成功微調人氣，何只短短一個月內，工作量倍增，騷價亦有顯著上調。
上週六（五月十七日）， Anjaylia孖住日模松岡李那和女子組合 Super Girls出席牛仔褲品牌 Evisu活動，一向走性感路線的松岡，落力露腰騷腿，七萬酬勞袋袋平安，而首度曬小蠻腰的 Anjaylia，勝在罕有，加上有劇出街，騷價同松岡睇齊，比起昔日薪酬，五級跳。「套劇出咗街， Anjaylia騷價係咁升，好多客都唔介意俾多啲，有價有市，部分仲 quota價搵佢拍廣告添！」一名公關公司人員透露。
|
鍾意就快D Share啦！
|
|
|
