繼早前「倫敦金美人計」、「美容美人計」、「情騙美人計」後，內地流行的「飯托」亦疑配上美人計殺入香港。近日大批「飯腳男」在交友App獲「美女」邀約食飯，結果埋單被劏到一頸血。律師提醒，雖然「美女」做法有欺詐之嫌，但客人也要先找數後報警，不要吃霸王餐，否則可能被反咬搞到一身蟻。
記者：郭美華 黃學潤 黎少英
「呢招以為大陸先興，點知依家香港都有！」、「上次食咗800元，我畀咗200就走！」、「我朋友見過工，表面請侍應，上到去先知原來係呃啲仔上嚟食飯然後分佣！」近日位於太子一間名為「唐三樓café」的餐廳成為網上熱話，大批網民指被剛認識的女網友帶去食飯，結果換來一肚氣。
《蘋果》接觸到其中一名受害人阿Ben，他早前在交友App「Hey！Mandi」認識一名少女，對方說失戀想搵人陪食飯，結果被帶上該Café，埋單800元，他形容：「啲嘢好難食，一食完飯，就再找不到她！之後我見佢不斷帶男人上去食飯！」據他觀察所見，參與「美人飯局」的少女至少有5人，他認為「美女」跟餐廳串通，手法儼如騙局，希望公開事件以免再有人中招。
記者日前到Café守候，發現其中一名年約20歲、身形略胖的少女行為相當可疑，由傍晚6時45分起不斷帶男子到該Café，每人僅逗留15至25分鐘便離開，其中有男伴在離開前仍關心道：「妳都冇乜食嘢，啲外賣妳攞返去食」惟當男子遞上外賣後轉身離開，少女隨即將外賣丟進垃圾筒，然後不斷在始創中心商場游走及打電話，再會合下一位「飯腳男」。
直至凌晨12時Café打烊的短短5個多小時內，該少女竟約會了11名「飯腳男」，只得2人沒上當。而少女每次與「飯腳男」見面時都會交足戲，聲稱「朋友介紹附近有間西餐廳幾好食」，又會故意扮「唔識路」，又查地圖，當行到該唐樓一樓時，又裝作找不到稱：「咦？點解係髮型屋嘅，唔知間餐廳係咪喺樓上呢？」惟當抵達餐廳後，她甫坐下卻裝可愛熟練地玩弄枱上的倉鼠。
記者向多名上當的「飯腳男」查詢，發現他們的經歷相若，女方在餐廳主動點餐，食物都大同小異，包括意粉、豬手、沙律等，還會叫「Shots」一套9小杯收費就要268元，各人埋單由400至1000元不等，有人更因不夠錢，由少女陪伴往提款。不過最令這班「飯腳男」感到氣忿的是，少女真人與交友App的頭像判若兩人，而且大部份人只吃了兩啖就被逼離開。
當Café打烊後，記者趁少女放工上前訪問，惟她甫見記者即拔足而逃，跑至數十米外的太子港鐵站，與Café的另一名少女會合，二人跟記者就如捉迷藏般，不斷躲躲藏藏，又由月台站頭跑至站尾，惟少女一直拒絕回應事件，只拋下一句「識你老母呀」。之後她又跑上列車，繼續在車廂內跑來跑去，當被記者追及時，更發火兩次大力拍打攝影機，最終在荔景站下車狂奔逃去。
而一直在Café負責落單、埋單，儼如老闆娘的中年女子，放工後到廟街找朋友，並到快餐店宵夜，記者上前訪問，她說自己並非老闆，僅在Café打工一個月，說「我咩都唔知㗎」、「有糧出咪得囉」，又說不認識少女，更說當日是她最後一天返工。惟記者其後亦見到少女和該中年女子返回Café，其間有6、7名女子先後腳上去。其餘大部份時間，Café都烏燈黑火，似暫停營業，但中年女子則間中到Café打點，至晚上關門離開。
昔日新聞
【美人計2】宅男戀美容妹變人肉提款機 2年遭搾乾50萬
https://bit.ly/2NZnUKn
【美人計】玩WeChat墮投資騙局 港男半日被蒸發2球：佢係感情騙子
https://bit.ly/2J7GIn6
你敢爆，我敢獎！ 立即WhatsApp《蘋果》24小時爆相爆片熱線或致電：63836568
|
鍾意就快D Share啦！
|
|
|
