2014年5月21日 星期三

[FACE 365] 沙僧之苦 記唔到劇本 唔想拍《西遊》 徐錦江自爆患讀寫障礙 徐錦江,MF,




已經參加過 2次法國畫展嘅徐錦江話最鍾意呢幅呂洞賓彩繪畫,佢拎出嚟直到收番埋都一直笑唔停口,呢幅畫曾於巴黎大皇宮美術館展出。

真面目

沙僧之苦 記唔到劇本 唔想拍《西遊》 徐錦江自爆患讀寫障礙

大台已經播出國內版《西遊記》兩星期有多,可惜收視認真麻麻最低 20點,網民日日洗版式狂鬧《西》劇太膠,能否順利播曬真係一大疑問。

身為《西》劇主要人物,演過唔少三級片的經典「啫神」徐錦江,上週一( 12日)在北京接受本刊專訪時直說:「創作一係成功,一係唔成功,咁先至係創作。」而修讀藝術,一向我行我素, 52歲的徐錦江,更自爆患有讀寫障礙,完全不能背誦《西遊記》劇本,靠看原著漫畫演繹沙僧,《西》劇真係膠得有理。




拍《西遊記》,徐錦江有苦自己知,「外景一係凍到死,一係熱到死,個頭都曬甩過 2次皮。」至於《西》劇被評「膠」,徐錦江冇乜反應,「內地看不到香港的討論區。」

上週一( 12日),於北京生活近十年的徐錦江,相約本刊到北京朝陽區 798藝術區其中一個工作室會面,原來曾經拍過不少三級片的「啫神」徐錦江熱愛藝術,自 3年前拍畢《西遊記》後已開始轉行做藝術家,在北京租下 3個工作室,日日畫畫、做雕塑及寫書法。

參加法國畫展

「每 10年我都會發展另一個事業,好似頭 10年我喺香港拍電影,第 2個 10年我去咗台灣、大陸拍劇。呢個 10年,我想做番啲我放低咗好耐嘅藝術工作。我細個已經有學書法同埋中國畫,𠵱家執番起支筆,起初有啲唔慣,不過法國已經邀請咗我過去參加畫展 2次。」

一直坐在徐錦江身邊的國內老婆殷祝平,期間忍不住插嘴:「你知道嗎?那年文化大革命,廣州第一家抄的家,就是他的家,一共抄了 11卡車出來,他家很有錢。」徐錦江為人低調,即低聲對徐太說:「不要講啦,又不是什麼。」

出身自黑龍江大富之家,父親是醫生,在廣州美術學院修讀藝術的徐錦江,散發文化氣息,不過他不喜歡閱讀,充滿藝術家脾氣的他,不單專注力失調,更有輕微讀寫障礙。

堂堂大男人,原來結婚 21年都唔慣袋太多錢喺身,徐太每日畀 100蚊老公袋住。而徐錦江多年來買過嘅車、屋全部都冇加自己名,財政大權喺曬老婆手上。

已經讀緊中二嘅徐錦江囝囝徐菲,一直喺大陸生活,徐太覺得北京教育比香港好喎。

獨立屋揸手

本身家底已經不俗,加上之後拍戲賺埋賺埋,徐錦江喺北京、上海同深圳都有物業,其中北京嗰間仲係三層獨立屋,有泳池,好富豪 feel。

睇公仔書開工

「本來係唔想拍《西遊記》,想專心做藝術,畫多啲畫留番個人畫展。張紀中(《西遊記》製片人)最早話開呢套戲嗰時話:『嗱,預咗你㗎喇』,我唔知真定假,點知真係開,咁冇計,都要拍。不過呢套劇我都花咗心思,雖然我唔睇劇本,我開工全部睇公仔書(漫畫),一套公仔書帶去開工。(你記性好差?)愈做功課愈死,你話聽日好緊要呀,快啲睇(劇本)呀……會呀,但係死喇,聽日去到現場唔記得咗喇,以前劇本啲 story board都係咁。去到現場我助手又讀一次俾我聽就得㗎喇!(呢啲係讀寫障礙?)係」

徐太補充說:「不過他是個最不認真的演員,見導演時,演員一般都會坐得好好的,但他就是覺得舒服就算;而且他真的很八卦,每一件事他都要問問看看。」原來徐太所指的,是徐錦江不能專心地去做完一件事。「好似坐飛機咁,坐 3個鐘我嫌長,咁我睇嚇呢個電視,又睇嚇人哋嗰個做緊乜,所以我乜都知,但係又知唔曬囉。」快 53歲的徐錦江一直患有專注力失調,好在輕微的讀寫障礙對生活未有做成太大影響,徐錦江更說除了 6年前醫好了抑鬱症後,未有再踏入過診所半步!咁就畫多啲畫陶冶性情,咪再拍膠劇

咪睇徐錦江做咁多三級片男主角,個樣又惡,佢本人其實幾怕醜,仲好文藝,閒時只愛寫書法同畫畫,更曾出版過個人畫集。

讀寫障礙冇藥醫

家庭醫生關嘉美

對於徐錦江同時患有讀寫障礙和專注力失調,家庭醫生關嘉美就話呢兩個病唔會遺傳,不過先天同後天都有可能發生。「其實呢兩個病,只要唔影響日常生活,唔影響到工作,基本上係無問題嘅。講真去求醫的話,藥物嘅幫助都唔係咁大,只要你搵到自己嘅生活方式,其實係無問題嘅。」

三級對手有幾 friend?

徐錦江大大話話拍過 17套三級片,佢話拍三級片絕非等錢使,只為藝術;而他跟當年的多位三級片女角重遇亦不會尷尬。

李麗珍 見過面

94年合作拍《不扣鈕的女孩》, 96年再拍《玉蒲團之玉女心經》,雖然合作過兩次,但之後只係喺國內片場撞過一次面,「大家都係專業演員,其實邊有講咩尷尬吖?見到面都係傾幾句,講真唔熟。」

翁虹 最 friend

網上圖片

94年首次合作《青樓十二房》和《滿清十大酷刑》後,二人都一樣移居咗去北京,徐錦江話二人不時都會約出嚟見面、飲茶,有時工作上有咩問題都會大家傾嚇。絕對冇尷尬,絕對做到好朋友咁話!

舒淇 失聯絡

同樣喺 96年嘅《玉蒲團之玉女心經》,除咗李麗珍之外,舒淇都有合作過。不過自《玉》片之後,徐錦江冇撞過舒淇,加上徐錦江好少會抄人牌,所以至今都冇再跟舒淇聯絡。



鍾意就快D Share啦!
Related Posts Plugin for WordPress, Blogger...