媽咪姐
孫敬安入稟告鄭多燕 「費事好似八婆咁鬧落去！」
上個月，鄭多燕嚟香港開咗兩場「鄭多燕萬人熱辣 show」，原本開開心心跳嚇舞，點知佢忽然喺尾場前開記招，炮轟主辦單位安排貨不對辦，令佢好失望！又話覺得票價都幾貴，影響咗入場人數。身為搞手嘅孫敬安即刻反擊話鄭多燕無理取鬧，會考慮搵律師告佢誹謗。
事隔唔夠 1個月，媽咪姐發現孫敬安真係入稟狀都出埋。即刻打俾孫敬安求證，佢就咁話：「本來我想息事寧人，太太（盧敏儀）都勸我唔好搞咁多事。不過呢排出去食飯，好多人都覺得我唔抵，因為行內人都知無理由開騷前咁樣指控主辦方，咁會影響個 show，好難做落去！佢做法唔專業。但出面啲人見佢咁指控我，我只得解釋，但解釋係咪真呢？有啲人唔知㗎嘛，所以我覺得應該入稟高等法院去控告佢，幫自己公司同埋製作團隊攞番個公道。交俾法律去判係佢啱定我啱囉！費事大家好似八婆咁鬧落去，唔知邊個係真嘅！」
|
鍾意就快D Share啦！
|
|
|
