今年 1月，劉愷威與楊冪於峇里島簽紙結婚。二人現身香港機場時，劉全程甜笑傍實老婆，反而楊冇乜表情，粒聲唔出。
滾熱辣
楊冪生女霸氣升級 劉愷威產房陪足 96小時
來自北京、今年 27歲的楊冪，周日（ 1日）於香港半山港安醫院，剖腹誕下七磅囡囡小糯米，正式成為單非媽咪。
一向擁有強國氣燄的楊冪，生女自然非同小可。除入住半山星級醫院，連手術費使近廿萬外，老公劉愷威亦隨傳隨到，寸步不離產房，剃鬚沖涼都唔敢。
楊冪有女揸手，劉丹夫婦亦就曬佢。上周一（ 5月 26日），本刊拍得奶奶單拖撲落街市執坐月補藥，大包細包幫新抱補身。另邊廂，特登由北京抵港探孫的楊冪父母，就一貫土豪作風，衣食住行五星級。
楊冪答應做劉家新抱後，愈來愈霸氣。今年初在峇里大婚，她除將婚禮變成女家主場，男家賓客寥寥可數。佗 B期間她與劉丹兩公婆同住沙田，搞到劉丹愛回家變怕回家。雖然楊冪難頂，但恨抱孫的劉丹為免新抱情緒不穩影響胎兒，公開表示自己和楊冪好夾。
5月 26日劉丹妻頻撲執補藥
楊冪來港待產，奶奶一直照顧周到。早前劉媽媽更親自到大圍，為新抱執補藥，之後再去買豬肉煲湯。撲足大半日，大汗疊細汗，呢個奶奶真唔話得。
楊冪坐月補藥
劉丹老婆當日手執一張藥單，到位於大圍金禧花園的中興藥房選購藥材。記者到過該藥房，中醫師鍾先生就表示最好要產婦親臨藥房幫襯，再因應體質而設計藥方。不過他指這味驅風補血湯，一般坐月產婦適用。
注意事項
1.產婦在生產後六十天內都可以進補，但產後頭十日才可服用驅風補血湯，調理氣血。
2.產後第十一日後，用鹿茸（一隻鹿茸角切片分八次）、高麗蔘二錢、加瘦肉或雞燉，連服兩個月。
3.亦可以間中食用燉燕窩及鮑魚進補，但燕窩及鮑魚就不可以與鹿茸同時服用。
以上純屬中醫師建議，產婦應根據個人體質來服食中藥。
搭早機趕返港
楊冪佗女時經已強勢難擋，更何況生女咁大件事呢！預產期為 6月中的楊冪，上周六（ 5月 31日）忽然腹痛入院，原本打算順產感受十級痛楚的她，亦聽從醫生建議，改為開刀生女。愛女提早面世，楊冪當然第一時間通知老公。當時身在上海拍劇搵奶粉錢的劉愷威，立即趕早機返港。劉愷威身邊人說：「楊冪生女咁大件事，阿威當然要見證呢個重要時刻佢漏夜由片場搭幾個鐘頭車，再趕飛機返香港，成個人落曬形，鬚又唔剃，頭又冇洗，真係唔見得人。」
據知楊冪入住港安醫院的貴賓房，一晚房價要三千八百蚊，加埋手術費及其他雜費，廿萬走唔甩。雖然房間設備齊全，亦有獨立廁所，但劉愷威長期坐在楊冪旁邊，未獲老婆指示唔敢行開。知情人士說：「雖然有女萬事足，但楊冪傷口仲係好痛，成日都冇乜心機。阿威咪一直陪住佢，屋企都唔返，等老婆瞓著佢先敢瞌一瞌。」直至目前為止，劉愷威經已連續四天留守醫院，真係名副其實 on call 96小時。
6月 2日女家土豪式探孫
楊冪父母拎住一袋二袋到醫院探孫，二人周身名牌，強國味極濃。
劉丹夫婦頻撲
劉愷威隨時候命，劉丹兩公婆亦輪流服侍新抱。今年 71歲的劉丹認真有心有力，雖然曾被楊冪嚇到怕回家，要終日流連高爾夫球場打發時間，但他這星期仍急不及待先到醫院，然後才返大台拍劇，為的只是想見孫女多一面。
而半年來一直照顧新抱，陪她產檢的劉丹老婆，上月已開始為新抱坐月作準備。上周一（ 5月 26日），司機就載住劉丹老婆到大圍買坐月補藥藥材。當日天氣酷熱，劉太不時街市藥房兩邊走，相當頻撲。雖然她當日戴住黑超，但記者發現她不時愁眉深鎖，認真難為了奶奶。
楊冪父母疏乎
男家擔起照顧新抱重任，相反楊冪家人似乎唔係咁緊張。楊冪懷胎十月，其父母上月中施施然由北京抵港。知情人士說：「兩老難得嚟香港，楊冪一早 book定洲際酒店套房，又安排七人車方便佢哋出入，仲叫定佢香港班 friend帶兩老去洗塵，似自由行多過探孫。」周二（ 3日），楊冪父母離開醫院，便坐七人車直駛銅鑼灣時代廣場行街醫肚。曾任公安的楊父全程說話豪邁，商場充斥其京腔。楊家作風土豪，但劉家就實事求是，希望小糯米的降臨，可以拉近中港兩家人的關係
圈中惡新抱
張栢芝 失控玩失蹤
當年張栢芝同謝霆鋒暪住拉姑結婚，加上有指拉姑嫌棄新抱娘家背景複雜，婆媳關係好極有限，霆鋒更出面為二人擺和頭酒。表面修好，不過栢芝經常熄電話，粒聲唔出帶走兩個仔玩失蹤，拉姑更不時呻掛住兩粒孫。
|
鍾意就快D Share啦！
|
|
|
