掃呢頁CODE去手機

2014年6月6日 星期五

[忽然1周 984] 高調拍拖向舊愛挑機 翠蕭部署明年結婚 翠蕭,黃翠如,蕭正楠,MW,




高調曬愛

舊愛何傲芝嗒有米嫩男新聞出街後,蕭正楠即日( 2日)約翠如 BB到淺水灣嬉水。話曬端午節正日,沙灘人頭湧湧,但翠蕭依然冇有怕,公然談情,向傲芝挑機。

《蘋果日報》圖片

媽咪姐

高調拍拖向舊愛挑機 翠蕭部署明年結婚

媽咪姐成日聽人講,男女分手,做唔成情侶,咪做朋友囉。不過掉番轉頭,做得成朋友,仲使乜分手?近排圈中活生生例子, 37歲蕭正楠撻著高登女神翠如 BB。花旦小生拍拖,向來係圈中禁忌,蕭公子早排喺維穩節目入面,大方認同女方拍拖,但何傲芝隨即以舊愛金句「邪不能勝正」暗寸翠如 BB姣撬男友,結果唱人唔死,自己已經萬箭穿心,俾人翻舊帳,話佢拜金好名牌暗交馬主狂黐富豪。

博同情不成,大台更加睬你都傻,呢一仗,何傲芝幾乎一鋪清袋。不過輸人唔輸陣,上月 27日佢孖住細佢六年嘅新歡(同樣傳係有米男)張明偉蜜遊銅記,示威也好,攬水泡亦好,起碼不致於孤單一人。

舊愛落魄,蕭公子幾日後就同翠如 BB揀正端午節,與眾同樂逼去淺水灣趁墟,踏浪拖手掃面珠,做足全套,最怕你見唔到。

摸面調情

玩完水,兩個人又依偎坐喺沙灘上,其間翠如 BB忍唔住伸手摸蕭公子面珠, sweet爆!

《蘋果日報》圖片

踏浪談心

曬到㷫烚烚,兩個人索性剝埋拖鞋走落水。你踢嚇我、我踢嚇你,你又踢嚇我、我又踢嚇你,噢!好鬼浪漫囉!

《蘋果日報》圖片

咁高調拍拖,當然首先要得到大台高層肯首,不過 32歲翠如 BB心急恨嫁亦係事實。媽咪姐收到風,「翠蕭戀」撻著短短三個月,男方已經登堂入室,去過馬鞍山聽濤雅苑拜會過女友家長。聽講世伯、伯母對蕭公子印象唔差,仲希望翠如 BB可以快啲嫁得出。蕭公子亦早有結婚打算,最快下年中迎娶女神過門。

何傲芝同蕭正楠拍拖時,得唔到承認,分手後,前度活得比你好,火燒心就梗㗎啦,不過今次何傲芝終於學乖少講幾句。

周二( 3日)佢出席活動時,對「翠蕭戀」所有問題,一概答:「我冇嘢講,你哋問番當事人!」對自己新戀情,就話「暫時未 ready!」

戀愛遊戲中,有時放過人就等同放生自己,識放手,先至係情場高手!

傲芝擺陣

上個禮拜二( 27日), 30歲何傲芝俾人影到轉嗒有米奀星張明偉,兩個拍拖逛琴行。冇咗個橙,嗱嗱聲搵個桔嘅何傲芝,冧到男方全程情深望實佢。

《蘋果日報》圖片

驚情耷頭

何傲芝坐張明偉架 Benz返屋企嗰陣,見記者影相,即時緊張耷低頭。

《蘋果日報》圖片

學乖收聲

翠蕭戀明目又張膽,周二( 3日),蕭公子舊愛何傲芝現身活動,之前衰多口搞到俾人唱番轉頭嘅佢,以前做主持成日隊人咪,家陣風水輪流轉,不過拎住超過廿個咪牌嘅佢,終於學識咩嘢叫沉默是金。

自製新聞

翠蕭沙灘真人騷既浪漫又 sweet,但有口痕網友話佢哋端午節去人多沙灘拍拖似做新聞多,真係天知地知翠蕭先知!

望修正果

亦有網友戥翠蕭戀開心,更希望佢哋可以快啲拉埋天窗,修成正果。

20萬福士 80萬 Range Rover

當年蕭正楠同何傲芝拍拖,何全程做蕭背後女人,直至兩年前撞車,先至俾人揭發戀情。當年仍未上位嘅蕭正楠,只係揸架價值廿萬嘅福士。點知兩年後,轉嗒翠如 BB嘅蕭公子,座駕已經幾級跳。都係嗰句,時也命也,俾人話拜金女嘅何傲芝,惟有嘆句認命。

《蘋果日報》圖片

《蘋果日報》圖片

新歡舊愛同一屋苑

何傲芝轉嗒嘅有米奀星張明偉,今年 24歲,喺美國加州洛杉機分校讀傳理系,返港後加入大台藝員訓練班,參加過《星夢傳奇》節目同拍過《 ON Call 36小時 II》,工作量寥寥可數。不過本身家底好嘅佢,同屋企人喺荔景華景山莊住過千呎單位,而咁啱得咁蹺,蕭正楠前年亦以 400多萬買入同屋苑一個 800呎單位。新歡舊愛共冶一爐,何傲芝唔驚撞口撞面會尷尬咩?



鍾意就快D Share啦!