容祖兒公開表示想兩年後結婚，乘機向英皇試水溫。
探熱針
轉會太陽城 揸百萬波子 劉浩龍全靠容祖兒
拍拖兩年，容祖兒與劉浩龍愈來愈高調，更公開講明計劃兩年後結婚，恨嫁恨到出口。認定未來對象，一如當事人所言，努力向目標奔跑，除了貼錢拍拖，祖兒亦碌盡人情卡，為男友事業鋪路。
將於七月約滿東亞娛樂的劉浩龍，由於一直不獲公司重視，為幫男友發圍，祖兒親自出面，向舊同學、太陽城娛樂行政總裁唐才智（ Alex）力薦，成功幫對方轉會。幫男友泊到新碼頭，就連掛住 JY 616車牌的百萬波子，亦已變成劉浩龍出入的戰車。有個天後女友，唔使等下一分鐘，乜都即有！
過太陽城
四月才推出新歌《說明書》的劉浩龍，原來已秘密與太陽城簽下三年合約，八月正式轉會，離開東亞娛樂。
「近年唱片好難做，東亞好多歌手都無碟出，師兄（劉浩龍）啲碟唔賣得，所以新歌《說明書》都只係出單曲碟，喺東亞咁多年，師兄嘅工作都好少，佢成日同 Joey呻，話公司唔睇佢，要搵地方走。」知情者說。
事業一池死水，劉浩龍成功簽約太陽城，也是天後女友功勞。
「太陽城娛樂嘅行政總裁 Alex，係 Joey嘅舊同學，為咗幫男友搭路， Joey約過 Alex出嚟食過幾次飯，又介紹埋師兄俾 Alex識。上個月，佢哋正式簽咗約，不過，英皇同太陽城始終係競爭對手，所以 Joey同師兄都唔敢咁揚。」容祖兒身邊人說。
天後易辦事
身家億計的圈中富婆容祖兒，千揀萬揀揀著一事無成的劉浩龍，女尊男卑，但錢可以解決的問題，便不是問題。
放聲氣
劉浩龍的身家事業同自己差天共地，但已經認定對方的容祖兒愛情至上，去年底透露想三十六歲生 B，早前出席林恬兒和何正德的婚禮，又再次放聲氣，希望兩年後結婚。
「 Joey成日同朋友講，話自己都唔細！身邊好多同學都生咗 BB，自己真係好想快啲結婚。其實師兄已經唔止一次開口求婚，但 Joey仲有公司英皇嗰關要過，唔敢貿貿然應承佢。」
為免觸動英皇的神經，已視劉浩龍為結婚對象的容祖兒唯有間中試水溫，睇反應。
「上次 Joey公開講話想三十六歲生 B，已經俾公司詐型，所以之後就改口話四十歲先生；今次公開話兩年後結婚，咪又係借啲意放聲氣，睇嚇公司有乜反應囉！」
據為己有
容祖兒處處為男友著想，亦不時安排機會，將對方帶入自己的朋友圈。
「以前 Joey乜都同 Mani（經理人霍汶希）商量，每日都通電話，但佢知 Mani唔係好 like師兄，仲成日有意無意叫佢俾自己多啲選擇，唔好太快做決定， Joey當然唔啱聽，同 Mani仲有英皇班姊妹都見少咗，反而成日黐住克勤 Wyman玩，一來佢哋唔會否定師兄，二來佢想男友黐多啲紅人，關係好啲，機會自然多啲。」
豁出去的容祖兒唔介意幫男友支付租金，租住跑馬地雲地利道寓所外，近日就連自己的百萬波子，亦被劉浩龍據為己有，這架掛住 JY 616（○一年老闆楊受成送）車牌的波子，已長期泊在劉浩龍寓所停車場。
特別車牌
容祖兒一直是老闆楊受成頭寵，除獲贈梨形巨鑽，為獎勵一姐，楊受成先後送上三個以祖兒英文名縮寫、生日日期組成的車牌，包括 01及 02年以 8,000元及 69,000元投得的「 JY 616」及「 JY6」。 09年，再以 120萬投得「 JY」車牌，作為祖兒入行十周年禮物。多年來，祖兒換車不換牌，至於已被劉浩龍佔用的波子車牌「 JY 616」，更是楊受成首個贈送祖兒的特別車牌。
|
鍾意就快D Share啦！
|
|
|
