探熱針
捱唔住 做到冧廠 JJ賣樓套現回氣
賈曉晨（ JJ）跟樊少皇拍拖後，這年來為配合男友，離經理人陳百祥，轉移基地長期留在內地拍劇。早個月， JJ更將○九年以一百九十多萬購入的將軍澳自住單位，以四百多萬售出，賬面賺過二百萬。套現揸錢，有指因 JJ早前曾突然在片場暈低，身體出現警號，多年來要擔家的她，為減輕負擔，唯有套現傍身，俾自己回氣。
片場暈低
為了首次執導的微電影《愛情是什麼》，賈曉晨專程返港，處女作製作過程， JJ一手一腳，但卻自動要求宣傳活動減量，爭取時間休息。
「 JJ呢兩年喺內地接住唔停拍咗幾部劇，大多數仲係古裝，夏天著住厚衫開工好辛苦，體力少啲都應付唔嚟，加上同少皇拍拖始終承受咗唔少壓力，情緒上落好大；試過有幾次喺片場開工突然暈咗，佢又唔想阻住進度，堅持繼續拍埋自己戲份先走，後來去做身體檢查，原來係內分泌失調。
「醫生話佢壓力大，又唔夠休息，身體開始頂唔順，暈低只係先兆，再唔理可能會有其他問題出現。 JJ做咗咁多年，為咗健康唔可以再咁搏，所以佢而家會做嚇停嚇，唔俾自己咁辛苦。」 JJ身邊朋友透露。
揸錢換安全感
要 hea住做， JJ為求心安，決定將○九年以接近二百萬購入的將軍澳單位出售，賬面賺一倍，揸錢唔揸磚頭。
「 JJ喺北京都有買樓，就算香港間屋賣咗，一樣有瓦遮頭，佢都計過曬數，揸住幾百萬嘅話，就算唔開工一段時間，都照樣有錢俾屋企，壓力唔會咁大。」
日前 JJ下午接受完無綫節目訪問，由電視城揸車到觀塘 apm行超巿，本刊上前問有關賣樓一事。
「價錢好咪賣囉！不過我唔會搬去北京，因為屋企人都喺香港，有工開先會去嗰邊。（係咪試過開工暈低咗？）係，所以而家要休息，都係內分泌失調，可能近排做嘢壓力大，應該冇大問題嘅。」 JJ說。
不勝負荷
機會唔等人，娛樂圈人嚇嚇搏到盡，搵得就搵，長此以往，健康難免出現毛病，搞到本來踩行油都要急煞停。
|
鍾意就快D Share啦！
|
|
|
