張家輝首執導演筒拍鬼片，落手落腳指導飾紅衣女鬼的大馬模特兒做戲。
探熱針
處男下海 張家輝 一味靠嚇
爆肌爆到再做影帝的張家輝，賣完 body再賣腦，處男執導拍鬼片《盂蘭神功》，在馬來西亞取景拍一場紅衣女鬼出現的戲份時，剛巧有班學生妹經過，張導即場試反應，結果嚇到班妹妹仔𠵱嘩鬼叫，收貨！
一定合格
自導自演的張家輝在新作《盂蘭神功》中著恤衫戴金絲眼鏡扮文弱書生，收埋人魚線，對處男作，他充滿信心。
「我唔敢講呢部係驚世之作，但肯定係一部合格嘅鬼片，入面嘅驚嚇場面同氣氛，一定可以滿足到觀眾。」張家輝說。
電影拉隊到馬來西亞取景，其中有個紅衣女鬼被吊在建築物門外的鏡頭，令張導好難忘。「工作人員打好燈度好位，扮女鬼嘅大馬模特兒都預備好曬，一頭散髮，件紅袍又大又長，見唔到五官同手腳，咁啱有班學生妹經過，個個都好大反應。」
心悠抽水
當時大概有七、八個學生行經外景地，因為顧住傾偈沒有為意，行到吊起紅衣女鬼的建築物時，企在對面街的張家輝突然大嗌：「喂！小心睇住呀。」眾人不以為意，回頭一看，見到披頭散髮紅衣人，個個嚇到又叫又走。效果夠驚嚇，張導滿意之餘，原本已經收工的劉心悠，亦忍不住抽抽水，在紅衣女前留影。
除了一味靠嚇，張家輝在戲中要俾人呃錢又要俾女飛。
「今次個角色完全唔同以往嘅電影，我想俾大家知道，我都可以做一啲脆弱同斯文嘅角色。」張家輝說。
|
鍾意就快D Share啦！
|
|
|
